VOV4.K’ho- Jat Hiệp hội lơh gơlik mờ tac hờ lơgar ndai phan tàm dà Việt Nam (VASEP) yal, 5 nhai bồ nam do, priă geh bơh tac hờ lơgar ndai phan tàm dà bơh lơgar Việt Nam dê geh mờr 4 tơmàn 500 tơlak dolar Mỹ, gơguh rlau 44,5% pơndrờm mờ bal dùl tŭ nam lài. Mìng is ka tra mờ ka ti geh mờr 2 tơmàn 800 tơlak dolar Mỹ.

Nàng kờñ dong ală tiah, mpồl lơh sa kă bro, hợp tak xã tac ală phan lơh gơs bơh phan tàm dà lơgar Việt Nam dê ngui ală bơta dong kờl bơh Hiệp địñ lơh broă bal Lơh sa tơl làm bă tiah (RCEP) dê nàng sơlơ jòi mpồl lơh bal, tàm tơrbŏ ală tŭ niam kă bro mờ tac tus drà kă bro ală lơgar tàm RCEP, tàm 2 ngai (30 mờ 31/5), Kụk hòi jà kă bro (Ƀộ Kông thương) pơgồp bal mờ ală Thương vụ- Đại sứ quán Việt Nam tàm ală lơgar tàm RCEP bơyai lơh Pơrjum kă bro pờ tơlik tơn tàm internet phan tàm dà lơgar Việt Nam mờ ală drà kă bro RCEP nam 2022.

Tàm dơ̆ pơrjum bal, ală cau jak chài, ală mpồl blơi phan bơh lơgar ndai, ala mat Thương vụ Việt Nam tàm 2, 3 lơgar tàm RCEP (bè Lo, Nhờk, Australia) geh yal tơnggit bè bơta pràn, jơnau kờñ mờ tŭ niam gơ wèt tus mờ ală bơta phan tàm dà bơh lơgar Việt Nam dê tàm ală drà kă bro RCEP.

Cau mblàng K’Duẩn