VOV4.K’ho- Nàng kờñ lơh bal, dong kờl ală mpồl lơh gơlik, tac bro phan bơkah tiơng pơn rơ tiah kơh bơnơm, tiah sar lơgar ngài mờ bồt dà lềng dê, drim ngai 05/10, tàm Hà Nội, Ƀộ Kông thương bơyai lơh Cribơyai lơh sa Lơh bal lơh gơlik, tac phan kă bro tiah kơh bơnơm, tiah sar lơgar ngài mờ bồt dà lềng nam 2022. Broă lam lơh Broă lơh bơtàu tơnguh kă bro tiah kơh bơnơm, tiah sar lơgar ngài mờ bồt dà lềng tơngai bơh nam 2015 tus nam 2020 neh cèng wơl ală cồng nha niam ngan bè gơguh kờp jơh khà tac rah rài phan bơna mờ broă drơng ala uă nam do tàm ală tiah gam uă kal ke.

Tơngai tus, Ƀộ Kông thương geh pơn jat tai đơng lam, pơgồp bal mờ ală Ƀộ, gah broă lơh dà lơgar, ală anih lơh broă geh gơ rềng mờ ală càr tiah kơh bơnơm, tiah sar lơgar ngài mờ bồt dà lềng lam lơh jat 6 kơnòl broă tờm, tàm hơ̆ geh lơh sir adat boh lam nàng kờñ pơn jờng bơtàu tơnguh lơh sa, pơndiang, tac bro phan bơna geh bơta pràn bơh tiah kơh bơnơm, tiah sar lơgar ngài mờ bồt dà lềng dê; kơlôi sơnơng bơtàu tơnguh kơ̆ kơljap, tơnguh bơta kuơ gơguh uă gơ wèt mờ ală phan bơna geh lơh gơlik tàm tiah kơh bơnơm, tiah sar lơgar ngài mờ bồt dà lềng; pơgồp bal mờ ală càr mờ ală mpồl tac phan nàng bơyai lơh ală broă lơh tac phan drơng broă lơh sa mờ ngui sa tàm tiah kơh bơnơm, tiah sar lơgar ngài mờ bồt dà lềng.

VOV Tây Nguyên- Cau mblàng K’Duẩn