VOV4.K’ho- Lam lơh jat Nghị quyết sồ 24 bơh Ủy ƀan Thường vụ Quôk hội dê bè broă pơn jat tai tă tơm priă dong kờl gơ wèt mờ cau lơh broă jat Nghị quyết sồ 3 bơh Ủy ƀan Thường vụ Quôk hội khoă 15 dê neh tong sră nggal di mờ tŭ tơngai hơ pơrgon. Kờp tus tŭ do, Ƀảo hiểm xã hội 63 càr, ƀòn dờng neh tă priă dong kờl ai rlau 243 rbô nă cau lơh broă in mờ khà priă là 689 tơmàn đông.

Nàng lam lơh di tŭ, sơrbac mhar mờ geh cồng nha broă lơh dong kờl jat Nghị quyết sồ 24, Kwang atbồ dờng Ƀảo hiểm xã hội Việt Nam ồng Nguyễn Thế Mạnh neh mhar sồr ală mpồl lơh broă mờng chài, Ƀảo hiểm xã hội ală càr, ƀòn dờng pơn jat tai lơh jat bơta geh ngan broă lam lơh bơnah dong kờl jat di broă rơndap lơh; ngui niam bơta ƀuơn bơh anih zữ liệu kông nghệ thông tin gah do dê. Bơdìh hơ̆ tai, Ƀảo hiểm xã hội Việt Nam sồr gròi sền tus broă yal tơnggit jơnau, mblàng yal nàng cau lơh broă neh tong sră dan dờp bơnah dong kờl di tŭ tơngai hơ pơrgon geh dờp broă lơh dong kờl di tŭ, wil tơl mờ loh làng.

Cau mblàng K’Duẩn