VOV4.K’ho - Mờ jơnau kờñ tơnguh bơtàu pràn kơl dang ƀòn dờng Dà Làc, càr Lâm Đồng jăt gùng dà gơguh tơlir, bơ̆t bơtàu ƀòn drà niam brê bơnơm geh pơnrơ ngan gùt lơgar dê, ngai 03 nhai 9 nam 2015, Thủ tướng Cíñ phủ ai lơh jăt kơrnoăt sồ 1528 bè ờ uă kơrnoăt krơi is tơnguh bơtàu ƀòn dờng Dà Làc dê. Mơya, tơnơ̆ mờ 7 nam lơh jăt cồng nha cèng wơl geh ờ uă ngan. Nđan lah neh geh kơrnoăt krơi is, mờ ƀòn dờng Dà Làc ờ pràn tơnguh bơtàu?

Jăt kơrnoăt sồr 1528 nam 2015 bơh Thủ tướng Cíñ phủ dê, kơrnoăt krơi is tơnguh bơtàu ƀòn dờng Dà Làc mờ tiah rềp bal, càr Lâm Đồng geh 5 tơngu me, tơrgùm ai broă rơndăp ù tiah tam pà tiah geh gơnoar, bơcri priă blơi ù lơh hìu ơm, tơmù priă ơpah ù mờ aloă rơndăp broă lơh nhơl chờ tơrgùm bal, ờ tă dia blơi phan bơh lơgar bơdìh drơng tàm broă tam biăp, bơkào ngui kông nghệ kao, ai lài priă bơh kes priă Dà lơgar ai ală broă rơndăp lơh bơ̆t bơtàu kwơ màng ƀòn dờng Dà Làc dê.

Tơnơ̆ mờ 7 nam lơh jăt kơrnoăt krơi is tơnguh bơtàu Dà Làc, cồng nha ờ hềt di bè jơnau kơ̆p kờñ

Tơnơ̆ mờ 7 nam lơh jăt kơrnoăt do, cồng nha loh làng ngan mờ càr Lâm Đồng neh lơh geh là ai ƀòn dờng Dà Làc gơs dùl tàm ală ƀòn dờng lam lài gùt lơgar bè broă tơnguh bơtàu lơh sa suơn sre jăt gùng dà broă lơh kông nghệ kao, mờ ală phan geh lơh bơh broă lơh sa suơn sre krơi is tàm tiah do dê mờ neh geh tăc tàm ală drà kă bro tàm lơgar mờ tăc mờ lơgar bơdìh. Ồng Nguyễn Văn Châu, Phó Kwang atbồ Sở Nông nghiệp mờ Phát triển Nông thôn càr Lâm Đồng pà git: “Pal đơs ngan là kờñ lơh sa suơn sre kông nghệ kao tơnguh bơtàu ndrờm bal mờ ală lơgar tàm tiah do mờ tàm dunia den broă blơi ală kông nghê, phan lơh broă pa bơh lơgar ndai mờ tàm lơgar ờ hềt geh lơh gơtùi là broă pal geh, pal geh ngan mờ mpồl lơh sa kă bro dê. Tàm tơngai do, lơh jăt kơrnoăt krơi is tơnguh bơtàu ƀòn dờng Dà Làc, ală mpồl lơh sa kă bro neh dờp broă dong kờl bè tơmù ha là ờ tă dia blơi phan bơh lơgar bơdìh. Bơh tŭ hơ̆ ai geh ală broă ngui kông nghệ kao, ngui broă lơh sa suơn sre ngăc ngar geh pơnrơ ngan, làng bol tus sền, bơsram broă mờng chài, gŏ geh cồng nha mờ bơcri priă lơh. Broă bơcri priă hơ̆ neh cèng geh cồng nha tàm broă lơh sa tơn ai mpồl lơh sa kă bro mờ làng bol lơh broă sa in”.

Pơlai ngan là kơrnoăt broă lơh krơi is ai ƀòn dờng Dà Làc in mìng rơ̆p geh bơta niam tàm broă tơnguh bơtàu lơh sa suơn sre jăt broă lơh kông nghệ kao. Tài geh uă bơta krơi is, ală tơngu me krơi is tàm kơrnoăt do ờ hềt geh càr Lâm Đồng lơh geh cồng nha nàng gơtùi dong kờl ƀòn dờng Dà Làc tơnguh bơtàu pràn.

Dà Làc kờñ ngan geh ù tiah nàng rề ơnàng

Bè broă ai ală cau bơcri priă lơh sa kă bro ù lơh hìu ơm, hìu ơm tăc bro rơndăp broă lơh nàng lơh hìu ơm, broă lơh hìu. Jơh 21 rơndăp broă gơwèt tàm mpồl geh ai lơh jăt kơrnoăt krơi is ndrờm ờ hềt tơl pràn hòi jà, ai geh bơta pràn gơwèt mờ drà kă bro ù lơh hìu ơm tàm ƀòn dờng Dà Làc mờ tàm tiah rềp bal, tài ală bơta kal ke ờ hềt lơh gơs phan bơna nàng geh tăc bro.

Bè kơrnoăt geh ai lài priă bơh kes priă dà lơgar (tàm hơ̆ geh bal priă ODA, priă tềm pềr bơh cíñ phủ, ală broă dong kờl geh jơnau kờñ, ai càn priă sa priă cồng ờ uă) nàng bơcri lơh tàm ală broă, rơndăp broă lơh tờm, rơndăp broă bơ̆t bơtàu phan bơna kwơ màng ƀòn dờng Dà Làc dê, ală rơndăp broă lơh gùng lòt geh bơta kă bro, lơh broă bal mờ lơgar ndai, tơrbŏ bal tiah... kung ờ hềt geh cồng nha loh làng. Mùl màl, UɃÑZ càr Lâm Đồng neh dan mờ Ƀộ Kế hoạc mờ Đầu tư, Ƀộ Tài cíñ nàng dan ai di pơgăp 19 rơbô 650 tơmàn đong nàng lơh jăt 21 rơndăp broă, broă lơh tờm tơnguh bơtàu ƀòn dờng Dà Làc. Tus tŭ do mìng rơ̆p geh 2 rơndăp broă geh Dà lơgar ai priă, 2 rơndăp broă geh kơrnoăt nàng bơcri priă. Mờ ờ hềt geh rơndăp broă lơh lơi geh ai tơmŭt tàm mpồl geh ai lài jăt jơnau hòi jà bơcri priă bơh Dà lơgar dê jăt kơrnoăt krơi is ai ƀòn dờng Dà Làc in.

Là cau neh kis đềt mềr mờ ƀòn dờng Dà Làc bơh ală nam tơnơ̆ mờ tơnklàs dà lơgar tus tŭ do, ồng Nguyễn Quốc Dũng, kis tàm sơnah ƀòn 8 đơs là, broă bơ̆t bơtàu ƀòn drà lơyài tàm broă bơcri priă mờ ờ ndrờm bal, broă ai rơndăp ù tiah lơh ờ di jăt mờ broă tơnguh bơtàu, lơh ƀòn dờng Dà Làc gơlik geh ală broă gơtìp kal ke. Bè broă gơtìp kòl gùng lòt tàm kàl nhơl chờ, dà tih dà cò, lơh gơbam dà tàm ờ uă tiah tŭ geh mìu sơr, hơ̆ sồng cau mus kơl aniai chi brê, sơgràm ù, bơ̆t bơtàu bơta niam mờ tơn jơh mơ broă lơh sa suơn sre tàm ƀòn drà. “Dà Làc neh geh ală kơrnoăt krơi is nàng tơnguh bơtàu lài, mơya dŭt ndơl geh uă bơta kal ke, mờ bơta kal ke do là tài kơrnoăt krơi is ờ loh làng. Hìu krơh den khăt gơboh lơh, mờ ù geh ai lơh sa suơn sre den geh tơn tàm gùl ƀòn dờng, hơ̆ sồng broă bơ̆t bơtàu den ờ hềt chồl pràn tàm broă atbồ, lơh gơtìp tus mờ broă di lah trồ geh mìu den gơbam dà. Pal lơh mơ broă rơndăp lơh, pờ ơnàng ƀòn dờng, bañ bơtềt den hơ̆ sồng geh bơsong mơ ală broă”.

Đơs bè broă lơh jăt kơrnoăt krơi is ai ƀòn dờng Dà Làc in, ồng Trần Văn Hiệp, Củ tịc UɃÑZ càr Lâm Đồng đơs là, bŭ lah càr neh lơh ngan, mơya gơtìp uă bơta kal ke, mìng là tài kal ke tàm ală jơnau ai bơh adăt boh lam dê: “Cồng nha là ờ hềt geh jăt mờ jơnau kơ̆p kờñ, tàm hơ̆ kal ke uă ngan kung gam là jơnau ai sơl, mờ kal ke bè bơta pràn dong kờl. Tàm kơrnoăt cih loh là ai lài priă bơh kes priă Dà lơgar nàng lơh jăt ală rơndăp broă geh lơh tờm tơnguh bơtàu ƀòn dờng Dà Làc in, hơ̆ sồng ai geh kơrnoăt bơcri priă nàng gờñ lơh jăt ờ uă rơndăp broă bơ̆t bơtàu kwơ màng geh bơta lơh broă bal mờ lơgar ndai, tơrbŏ bal mờ ală tiah. Bè gùng ntoăt jờl den pal geh ai lài lơh, mơya mùl màl kung là di mơ”.

Geh git, UɃÑZ càr Lâm Đồng neh geh sră nggal yal broă lơh jăt kơrnoăt sồ 1528 mờ dan mờ Thủ tướng Cíñ phủ in sền mờ lơh wơl ờ uă kơrnoăt, broă lơh krơi is gơwèt mờ ƀòn dờng Dà Làc bè lơi ring bal mờ ală jơnau ai bơh tàm adăt boh lam mờ di pal mờ broă kờñ tơnguh bơtàu lơh sa mpồl bơtiàn ƀòn dờng Dà làc dê. Tàm hơ̆, pal sền kwơ tus mờ broă ai lài krơi is gơwèt mờ ală rơndăp broă bơcri priă gơwèt gah nhơl chờ, ơm rơlô să, ù lơh hìu ơm, hìu ơm, lơh sa suơn sre kông nghệ kao tàm ƀòn dờng Dà Làc mờ tiah rềp bal. Kơrnoăt ai lài neh geh bơh 7 nam lài, mơya broă lơh jăt ờ geh cồng nha, tŭ do pal dan lơh wơl tai, ờ hềt git tus tàm tŭ lơi ƀòn dờng Dà Làc, càr Lâm Đồng hơ̆ sồng gơtùi tơnguh pràn nàng gơs ƀòn drà niam tiah brê bơnơm krơ is geh pơnrơ ngan gùt lơgar bal mờ tàm tiah do dê bè jơnau kơ̆p kờñ.

Cau cih Quang Sáng – Cau blàng Ndong Brawl