VOV4.K’ho- Tuy Đức là kơnhoàl tiah nhàr lơgar, càr Dăk Nông dê. Lài do, rài kis làng bol ală jơi bơtiàn kòn cau tàm do dê tìp uă ngan kal ke, siơ̆u siar. Ală nam do, làng bol kòn cau M’nông tàm Tuy Đức neh geh càn ală bơnah priă ai càn bơh ngân hàng dê nàng bơcri priă tờm chi jŏ nam bè kơphê, tiêu, macca dùl bă geh cồng nha. Kơnờm bơh hơ̆ priă lơh geh gơguh tai, rơhời tơn jơh jơgloh, tơrmù rƀah dùl bă kơ̆ kơl jăp.

Ùr bơklau ồng Điểu Minh ơm tàm ƀòn Bu Dưng, xã Dăk Rtih, kơnhoàl Tuy Đức, càr Dăk Nông dê geh rlau 6 lồ ù mìr. Lài do mìng tùc kòi mờ tam phan sa lơyah ngai lơm, priă lơh geh bơh lơh sa pah nam ờ gŏ geh kàr lơi. Tŭ do, bă ù rlau 6 lồ do neh là sươn kơphê, tam tàm bơrlŭ bal mờ tiêu tơrlir niam dờng ơning ơnàng ngan. Điểu Minh pà gĭt, sươn chi ờ tŭ lơi gơtìp tu kòp lơh aniai là tài bơh ồng lơh jăt niam ngan broă pơlam lơh bơh broă săc rwah sơntìl tus bơta chài sơngka sền gàr. Kwơmàng là tơrmù uă ngan broă ngui phơng hoá họk, mìng ngui phơng hữu kơ lơh geh bơh è kơnrồ hìu bơnhă dê. Kàl pa do, bulah giă tiêu, mờ kơphê kung gam ơm tàm khà lơyah ngan sơl mơya tơnơ̆ tŭ kờp jơh jơh ală priă tă lơh, hìu bơnhă ồng neh lơh geh priă cồng rlau 1 tơmàn đong. Ùr bơklau ồng Điểu Minh tŭ do neh geh hìu đam niam hàng mờ ală phan ngui kas mơda ngan ndrờm sơl bè ală hìu bơnhă pas sơm tàm tiah drà. Geh rài kis bè ngai do là broă lơh ngan brồ guh bơh bàr nă ùr bơklau dê, mơya dùl bơnah ờ dùl êt là kơnờm bơh priă càn ngân hàng dê. Ồng Điểu Minh, đơs: Añ càn priă Agribank dê pơgăp mờ do neh 5 nam gơbloh. Lài do, hìu bơnhă añ kung tam phan lơh broă sa sươn sre sơl mơya lơh ờ gŏ geh priă bơcri den tàng kung kal ke ngan sơl. Tŭ bơh càn priă den bàr nă ùr bơklau añ blơi phơng sih, blơi sơntìl, tơngai sơngka sền gàr. Tus tŭ do, bol añ neh geh priă jền bơh hìu bơnhă dê kung geh sùm đau sơl.

Hìu bơnhă bi Thị Hoa, ƀòn N’Drung, xã Dăk Buk So kung là dùl tàm ală hìu bơnhă brồ guh kơnờm bơh priă jền geh càn bơh ngân hàng dê. Bi Thị Hoa yal, bơklau kòp ờ gơtùi lơh broă kơn jơ̆, dùl nă să bi drơng lơh jơh ală broă bơh hìu bơnhă dê. Lài do, bi mìng khin càn priă ngân hàng dê 50 tơlak đong lơm nàng rê blơi chi sơntìl, phơng sih nàng tam, sơngka sền gàr sươn kơphê, tiêu. Bơcri priă geh cồng nha, tơm geh priă càn lài, bi Thị Hoa càn tai priă pa nàng tơrgùm sơngka sền gàr sươn chi. Bi Thị Hoa chờ hờp yal: Añ càn priă ngân hàng dê 150 tơlak đong nàng bơcri tàm broă tam tiêu, kơphê. Kơnờm bơh hơ̆ lơh geh priă jền ròng siam oh kòn lòt bơsram. Kơnờm càn priă ngân hàng dê mờ hìu bơnhă añ geh priă nàng bơtàu tơnguh lơh sa, geh priă sơngka sền gàr tiêu, kơphê den tàng rài kis neh ờ huan đau kal ke uă rlau.

Ồng Ngô Văn Thương, ătbồ ing Củ tịc Ủy ƀan Ñân zân xã Dăk Buk So pà gĭt, lài do tàm xã neh geh jơnau càn priă bơdìh gơtìp cau sa priă cồng uă ngan, ngan là tàm ală tơngai cau lơh broă sa gơ jal ir priă jền nàng blơi phơng sih, sơnơm sền gàr phan tam nàng gơ in di nhai kàl. Tơngai rềp ndo, kơnờm ală ngân hàng ai càn mhar, di tŭ ală bơnah priă càn mờ jơnau càn priă bơdìh gơtìp cau sa priă cồng uă neh geh tơrmù đau mờ kơryan geh uă ngan. Ồng Ngô Văn Thương yal: Gơwèt mờ làng bol den càn priă bơh ngân hàng Agribank Tuy Đức dê nàng lơh sa geh cồng nha ngan. Kwơmàng là tàm broă lơh rơcăng sơndră kòp Kovid-19 den ngân hàng neh dong kờl bè priă cồng ai ală cau dùl nă să is mờ mpồl cau tàm ù tiah kơnhoàl dê in uă ngan. Añ sồr là ngân hàng pơn jăt tai tơnguh bơnah priă ai càn ai làng bol in.       

Ồng Nguyễn Ngọc Thanh, Kwang ătbồ Ngân hàng Agribank Tuy Đức, càr Dăk Nông pà gĭt: Tơngai lài, ngân hàng Agribank Tuy Đức neh lơh jăt niam broă lơh dong kờl tơrmù priă cồng ai càn priă gơwèt mờ cau càn priă gơtìp gơrềng tài bơh kòp Kovid-19. Geh 2 rbô 52 nă cau càn, mờ priă càn là 450 tơmàn đong neh geh tơrmù rlau 1 tơmàn 500 tơlak đong priă cồng. Agribank Tuy Đức sùm rơcăng ai càn priă ai cau càn priă in, ngan ai càn priă mhar, mờ di tŭ. Ồng Nguyễn Ngọc Thanh, đơs nền: Lài ngan, Agribank sùm đơs nền gơnoar broă mpồl cau tờm gơwèt mờ broă lơh lơh broă sa, cau lơh broă sa mờ ƀòn lơgar. Mờ broă lơh bơceh pa, tam gơl pa Agribank sùm lòt bal mờ làng bol, dong làng bol càn priă dùl bă ƀươn ƀoài nàng lơh sa kă bro bơtàu tơnguh uă rài kis, pơgồp bơnah bơtàu tơnguh lơh sa, pơgồp bơnah tơrmù bơta càn priă bơdìh gơtìp cau sa priă cồng uă tàm kơnhoàl.

                                                         Cau cih VOV Tây Nguyên- Cau mblàng Lơ Mu K’Yến