VOV4.K’ho - Ngai òr (19/08), tàm càr Ninh Thuận, Ƀộ Kông thương bơyai lơh pơrjum gah kông thương 15 càr, ƀòn dờng tiah tàm gùl lơgar mờ Tây Nguyên dơ̆ 13. Tơngai do, 15 càr, ƀòn dờng tiah tàm gùl lơgar mờ Tây Nguyên neh lơh geh cồng nha dờng màng tàm uă gah broă.

Pơrjum cri bơyai bè broă ai geh broă pơgồp bal, dong kờl bal, lơh broă bal tàm broă tơnguh bơtàu gah kă bro tiah tàm gùl lơgar mờ Tây Nguyên

Tàm hơ̆ uă ngan tàm nam 2021, tiah do geh 2 tiah geh ơm tàm mpồl 5 càr, ƀòn dờng geh khà gơguh GRDP uă ngan gùt lơgar là: Gia Lai 9,71%; Ninh Thuận 9%, gùt lơgar gơguh 2,58%. Bơdìh mờ ală cồng nha neh lơh geh, broă lơh sa mờ măi mŏk, kă bro bơh ală càr, ƀòn dờng gam geh ờ uă broă gam ờ pràn, gơtìp kal ke, tàm hơ̆ uă ngan là bè adăt boh lam, kơrnoăt lơh broă, broă dong kờl mờ broă bơyai lơh ală broă tơrbŏ bal tiah, pơgồp bal broă tơnguh bơtàu. Nàng tơmù ală kal ke, ờ pràn, Pơrjum neh tơrgùm cri bơyai, tam pà bal broă mờng chài nàng bơsong ală kal ke, gơkòl gơrềng tus mờ broă atbồ dà lơgar bơh ală càr, ƀòn dờng dê, bơh tŭ hơ̆ ai geh ală broă chồl pràn broă lơh sa kă bro, ai geh broă tơrbŏ bal, dong kờl bal, lơh broă bal tàm broă tơnguh bơtàu gah kông thương tơl càr, ƀòn dờng mờ gùt tiah do dê.

Cau mblàng Ndong Brawl