Thiếu tá H’Quý Rơ Chăm lơh broă tàm Mpồl mblàng yal niam chài- Cơldŭ lơh broă cíñ trị Gah đơng lam Mpồl ling klàng càr Dăk Lăk. Rlau 20 nam đềt mềr mờ Mpồl mblàng yal niam chài, bi neh òt gơ lơh bè jơh gùt ƀòn lơgar tiah kal ke bơh càr dê, mờ kơ̆p kờñ cèng jơnau đơs crih pơgồp bal dong làng bol tam gơl bồ tơngoh kơlôi sơnơng, tơnguh uă bơta gĭt wă bè ală gùng dà broă lơh, adat boh lam bơh Đảng, Dà lơgar dê. Bơdìh hơ̆, mờ gơnoar broă là Củ tịc Mpồl cau ùr Gah đơng lam ling klàng càr Dăk Lăk, bơh nam 2019 tus tŭ do, bi H’Quý Rơ Chăm neh lam lơh geh cồng nha ală broă lơh bè “cau ùr jak broă dà lơgar, jak broă hìu bơnhă”, “Broă lơh hìu bơnhă ling geh griăt hờn chờ”, dờp dong kờl 3 nă sau kòn cau ling geh griăt geh rài kis kal ke; tus bal jơh nùs dong kờl gàr niam rài kis mpồl bơtiàn tàm ƀòn lơgar... Thiếu tá H’Quý Rơ Chăm đơs bè broă lơh bè lơi nàng lơh sir jak ngan broă lơh:“Jat tơl tŭ tơngai, pơn yơu bè tŭ mpồl mờ geh ală broă lơh dờng, ală broă lơh lơh uă, den añ pal gơ jal ngan lơh tai tàm tŭ ơm rlô, ngai rlô, nàng lơh bè lơi lơh geh bơnĕ bơnài bal lơh jat kơnòl broă gah lơh broă ờs mờng mờ broă lơh dờp lơh tai bơh he dê. Tŭ rê tàm hìu, añ lơh ngan lơh tơl gơnoar broă là dồ nă cau  mè, cau pơ ùr tàm hìu bơnhă dê”.

Ai gơwèt mờ bi Trần Thị Hải Yến, Ƀí thư Đảng ủy, Cíñ trị viên Mpồl đơng lam Ling klàng ƀòn drà dềt Quảng Phú, kơnhoàl Cư M’gar, broă lơh sùm bơsram jơnau gĭt wă mờ bơta chài lơh broă neh dong bi 5 nam sùm lơh geh khà mat jờng rơ kwang bàng bơto bơtê cíñ trị jak kấp càr tàm càr Dăk Lăk dê. Nam 2023, bi tus bal dơ̆ tàm pơrlòng jơh gùt ling klàng cíñ trị jak bơh Ƀộ Ling klàng dê bơyai lơh mờ lơh geh khà pơn jờng. Bi Trần Thị Hải Yến, đơs: “Lài do, añ lơh broă tàm Cơldŭ lơh broă sền gàr adat boh lam mờ neh lơh uă ngan dơ̆ mblàng yal tàm ală thôn, ƀòn tàm ù tiah kơnhoàl dê bè broă lơh adat boh lam. Tŭ lơh broă tàm Mpồl lơh broă adat boh lam Mpồl duh broă làng bol kơnhoàl, kung neh jat sền bè gah sac rơwah ling neh kơlôi sơnơng nền nòn ală sră nggal tàm gah do, den tŭ tàm pơdar rê lơh broă tàm ƀòn lơgar broă lơh bơto bơtê cíñ trị ai mpồl ling griăp bòn in ờ gŏ kal ke. Ai gơwèt mờ broă lam lơh kơnòl broă sền gàr dà lơgar, den tàm tŭ tơngai lơh ngan lơh broă bơh să tờm dê añ lơh jài bơsram jài, kung ndrờm lơh sir jak ngan lơm kơnòl broă geh jàu”.

 Jak broă dà lơgar, jơh bal bi H’Quý mờ bi Hải Yến kung ndrờm lơh jak broă hìu bơnhă, gàr niam ram mhŭ hìu bơnhă. Bi Lê Ngọc Nghĩa, bơklau bi Hải Yến, pà gĭt, gĭt broă lơh bơh pơ ùr dê, bi sùm crăp rcang tam pà bal broă tàm hìu bơnhă:“Ală tŭ pơ ùr geh broă lơh nisơna, halà pal lòt lơh broă, añ rơ̆p ala pơ ùr sền gròi, bơto bơtê oh kòn. Pơndờm pơnđiang ală kòn sền krơh mè dê nàng bơto bơtê ai kòn in, tài bơh hơ̆ là krơh cau ngan broă ngan. Uă tŭ kung lơh geh bơta kờñ ngan ai kòn in nàng tơnơ̆ do ală kòn geh bơta pràn pơnđơl pràn lơh ngan bè mè khai dê sơl”.

Đơs bè ală bi H’Quý Rơ Chăm mờ Trần Thị Hải Yến, Đại tá Trần Minh Trọng– Cíñ uỷ Gah đơng lam Ling klàng càr Dăk Lăk pà gĭt, do là ală cau dồ nă să pơn rơ ngan tàm srơh tàm pơrlòng lơh tus geh bơh càr dê tàm tơngai pa do:“Ală bi H’Quý Rơ Chăm mờ Trần Thị Hải Yến ngan ngồn là ală gar sơnđèk kwơ màng tàm srơh tàm pơrlòng lơh tus geh bơh mpồl phàu crong càr dê tơngai bơh nam 2019 - 2024. Do ngan ngồn là ală “bơkào niam ngan” tàm suơn bơkào tàm pơrlòng bơh mpồl ling phàu crong càr dê, rơ̆p lơh geh bơta gơrề uă mờ lơh gơ dan kờñ ai kwang bàng, cau ling, kung bè ală cau tàm mpồl cau ùr tàm mpồl phàu crong càr Dăk Lăk dê”.

Đại tá Trần Minh Trọng đơs sùm, gĭt wă jrô ngan jơnau bơto bơh Wa Hồ dê: “Tàm pơrlòng là kờñ dà lơgar, kờñ dà lơgar là pal tàm pơrlòng. Cau tàm pơrlòng là ală cau kờñ dà lơgar uă ngan rlau jơh”, ală nam do, srơh tàm pơrlòng lơh tus geh tàm mpồl phàu crong càr Dăk Lăk dê neh lơh gơ rề ngai sơlơ jrô ơnàng làm uă. Bơh srơh do, neh geh gĭt nđờ jơ̆t nă cau dồ nă să, mpồl cau pơn rơ jak ngan, mờ uă broă lơh niam, broă lơh pa, pơgồp bơnah bơt bơtàu mpồl phàu crong càr Dăk Lăk ngai sơlơ di pal mờ jơnau sồr, ngăc ngar jak chài, lơh geh ală jơnau sồr kơnòl broă tàm bơta pa.