Tàm Kông ty Kổ phần Lòs ASEAN gơwèt tiah lơh sa mờ măi mok Hoà Phú, ală hìu lơh broă mờ măi mok neh lơh broă jơh bơta pràn. Jăt mò Lê Thị Tuyết Hạ, Phó Kwang atbồ kông ty đơs, geh di pơgăp 600 nă kông ñân neh mŭt lơh broă tàm ală ngai bồ nam. Kông ty kung neh dờp geh uă pang sră dan blơi phan bơh ală mpồl lơh broă dê, kơ̆p kờñ ală bơta sơn đờm pa niam bơnĕ tàm nam 2024 do.

Mò Lê Thị Tuyết Hạ đơs: “Tơnơ̆ mờ tŭ tơn jơh dơ̆ ơm rơlô, ngai sơn đờm nam pa lơh broă, ală bơnah broă neh lòt lơh broă tơl bồ nam den Mpồl Kwang atbồ kung pà priă nàng pơlam nùs nhơm mờ chờ gờm Satềp nam pa ai jơh ală oh mi in. Mpồl đơng lam kung kơ̆p kờñ drà kă bro geh niam, ală broă lơh geh uă kông ty lơh sa kă bro kơl jăp nàng cau lơh broă geh broă lơh, priă geh kơl jăp”.

Kung tàm ală ngai bồ nam pa Giáp Thìn sơl, Kông ty TNHH mai soh Lực Thiêm tàm Mpồl lơh sa mờ măi mok Tân An 2 neh dờp geh uă pang sră dan blơi phan pa. Ồng Trần Trí Vỹ, Kwang atbồ Kông ty pà git, 1 rơbô nă kông ñân neh tus wơl lơh broă, tàm hơ̆ geh 95% là cau jơi bơtiàn ờ gal cau mờ 90% là cau ùr. Tŭ do, Kông ty gam mhar rơwah tai cau lơh broă mờ rề ơnàng hìu lơh broă nàng di pal mờ ală pang sră dan blơi phan pa.

Ồng Trần Trí Vỹ đơs: “Mpồl lơh sa kă bro ngai 10 Satềp neh lik lơh broă, ngai lơh broă sơnrờp ngan he lòt lơh broă den jơh ală kông ñân mŭt lơh broă geh tus 98%. Nam do sră dan blơi phan gơguh rơlao mờ nam lài di pơgăp 20%, bơta do ai geh bơta pràn nàng mpồl lơh sa kă bro gơtùi bơtàu tơnguh mhar rơlao. Tŭ do, Kông ty gam rơwah cau lơh broă, cau lơh broă tàm càr uă ngan, tŭ do geh 1 rơbô nă kông ñân. Tàm quý I do, kông ty geh rơwah tai 300 nă kông ñân nàng di pal mờ pang sră dan blơi phan bơh kông ty dê”.

Bơta tơngŏ chờ bơh mpồl lơh sa kă bro neh dong kờl ală kông ñân chờ hờp rơlao tŭ lòt lơh broă tàm ală ngai bồ nam pa. Lŏ H’ Theo Triết kis tàm ƀòn Jun, xã Yang Tao, kơnhoàl Lăk tŭ do lơh kông ñân tàm Kông ty TNHH mai soh Lực Thiêm pà git, geh lơh ngan lơh broă niam gah broă să tờm nàng geh uă priă. Lŏ H’ Theo Triết đơs: “Bơh tŭ añ mŭt lơh broă tàm kông ty, rài kis añ geh gơguh rơlao mờ priă geh bơh Kông ty kung uă rơlao. Jơh satềp añ gŏ ală cau ndrờm chờ hờp nàng pơn jăt tai lơh broă”.

Jăt ồng Nguyễn Kim Tùng, Kwang atbồ Mpồl atbồ Mpồl lơh sa mờ măi mok Tân An pà git, tŭ do mpồl lơh sa mờ măi mok geh 73 mpồl lơh sa kă bro gam lơh broă, khà geh tơl 100%. Ală ngai bồ nam 2024 nùs nhơm lơh broă tàm ală hìu lơh broă gah niam, mờ lơh ngan tơnguh cồng nha lơh broă, tơnguh bơta phan phan geh lơh. Ồng Nguyễn Kim Tùng pà git tai: “Tus tŭ do là 100% mpồl lơh sa kă bro là neh sơn đờm lơh broă mờ khà kông ñân lài mờ satềp, tơnơ̆ satềp ờ geh tam gơl uă mờ broă rơndăp lơh di jăt mờ jơnau kờp dŭ, den tus quý I mờ quý II tơnguh tai 2 rơbô nă cau. Bồ nam pa gŏ mpồl lơh sa mờ măi mok, kwang bàng, cau lơh broă mờ kông ñân nùs nhơm chờ lơh broă. Kung kơ̆p kờñ tàm nam 2024, lơh sa ờ gam gơtìp kal ke tai mờ ală cau lơh broă chờ hờp mờ cèng geh uă priă mờ rài kis niam rơlao ai làng bol kis tàm do in”.

Nam pa 2024 mờ ală bơta tơngŏ chờ gơwèt mờ mpồl lơh sa kă bro, cau lơh broă tàm càr Dăk Lăk cèng geh nùs nhơm pin dờn, kơ̆p kờñ ală cồng nha pa tàm broă bơtàu tơnguh lơh sa mpồl bơtiàn, tơnguh rài kis làng bol in.