VOV4.K’ho - Mho òr (13/10), Mpồl ală mpồl lơh sa kă bro càr Dăk Lăk pơgồp bal mờ Mpồl Cau lơh sa kă bro kơnòm să càr Dăk Lăk bơyai lơh dơ̆ tìp măt chờ gờm di ngan Cau lơh sa kă bro Việt Nam ngai 13 nhai 10.

Kwang đơng lam càr Dăk Lăk pà bơkào chờ gờm ală mpồl lơh sa kă bro

Tàm dơ̆ tìp măt, Kwang đơng lam Mpồl mpồl lơh sa kă bro càr yal bè broă lơh tàm 9 nhai tàm nam 2022. Sền dơ̆ kĭ hơ bal tơl ală bơta đah Mpồl ală mpồl lơh sa kă bro càr Dăk Lăk mờ Mpồl cau lơh sa kă bro kơnòm să càr Dăk Lăk. Càr Dăk Lăk tŭ do geh mờr 11 rơbô 800 mpồl lơh sa kă bro gam lơh broă, ơm dơ̆ 22 gùt lơgar mờ dơ̆ 2 tàm Tây Nguyên. Mờ broă tơnguh bơtàu mhar bè bơta geh, mpồl cau lơh sa kă bro, mpồl lơh sa kă bro neh geh uă broă pơgồp bal tus mờ broă tơnguh bơtàu lơh sa mpồl bơtiàn càr dê. Jăt ồng Huỳnh Văn Dũng, Củ tịc Mpồl ală mpồl lơh sa kă bro càr Dăk Lăk yal, bơh bồ nam tus tŭ do, càr Dăk Lăk neh crơng gơs pa rơlao 1 rơbô mpồl lơh sa kă bro, gơguh mờr 26% pơn drờm mờ tŭ do nam lài. Broă tơnguh bơtàu do geh ai tai bơta pràn tus mờ mpồl lơh sa kă bro càr Dăk Lăk dê, pơgồp bal tàm broă kơ̆ kơl jăp mờ tơnguh lơh sa càr dê.

Di tơngkah kir sơnrai Ngai Cau lơh sa kă bro Việt Nam, mho ngai 13/10, tàm ƀòn dờng Kon Tum, Ủy ƀan Ñân zân càr Kon Tum bơyai lơh Pơrjum tìp măt tơm bơh bơr mpồl lơh sa kă bro dơ̆ 2. Do là broă lơh geh cồng nha nàng càr Kon Tum bơsong di tŭ ală kal ke, bơta gơkòl bơh mpồl lơh sa kă bro dê tŭ tus lùp, lòt sền, bơcri priă mờ pơgồp bơnah lơh niam wơl tiah bơcri priă lơh sa kă bro tàm càr.

Anih bơyai lơh dơ̆ pơrjum tìp măt

Đơs tàm pơrjum tìp măt tơm bơh bơr mpồl lơh sa kă bro dơ̆ 2, ồng Nguyễn Hữu Tháp, Phó Củ tịc Ủy ƀan Ñân zân càr Kon Tum đơs nền, jờng rơ ală cau lơh sa kă bro, mpồl lơh sa kă bro neh lơh ngan sơrlèt gan kal ke, geh ală tă pơgồp kwơmàng tàm bơtàu tơnguh wơl mờ bơtàu tơnguh lơh sa- mpồl bơtiàn bơh càr dê tơnơ̆ tơngai gơbàn kòp Kovid-19. Mờ nùs nhơm sơrmah sơrmài, song dơ pă, tàm Pơrjum tìp măt tơm bơh bơr mpồl lơh sa kă bro dơ̆ 2, ala măt bàr pe mpồl lơh sa kă bro neh dan mờ kwang đơng lam bồ càr Kon Tum uă broă gam gơtìp tàm ală tŭ lùp, lòt sền, bơcri priă mờ lơh broă lơh sa kă bro tàm càr.

Cau cih VOV Tây Nguyên- Cau mblàng Ndong Brawl mờ Lơ Mu K'Yến