VOV4.K’ho- Ngai do (16/02), 2 rbô 656 nă ơruh pơnu bơh càr Gia Lai dê geh lòt gùng lơh kơnòl ling klàng mờ kwang àng làng bol. Tus tŭ do, ală cau neh geh mat tàm anih geh sồr nàng xét nghiệm mhar kòp Kovid-19 mờ ai mẫu xét nghiệm mờ broă lơh RT-PCR. Khà cau do geh jàu ai ală mpồl: Quân đoàn 3, Quân khu 5, Kwang àng càr, Gah đơng lam mpồl ling sền gàr tiah nhàr dà lơgar càr mờ gah đơng lam ling klàng càr. Jat tơrgùm kờp, khà cau lòt ling nam do geh ƀằng bơsram kấp 2, kấp 3 mờr 80%; geh ƀằng trung kấp, kao đẳng, đại họk rlau 1,4%; đoàn viên geh rlau 76%; geh 22 nă cau là đảng viên. Nam do, tàm khà 2 rbô 250 nă ơruh pơnu lòt gùng lơh kơnòl ling klàng geh tus 61% là cau jơi bơtiàn kòn cau dùl êt nă cau. Nàng ală ơruh pơnu in iang nùs lòt gùng lơh kơnòl ling klàng, ală tiah neh lam lơh lùp còp, pơn jờng, tơrgùm lam lơh niam broă lơh dong kờl tơnơ̆ ling klàng.

Nam 2022, càr Lâm Đồng geh jào khà rơwah mờ hòi lòt ling geh 1 rơbô 150 nă cau klao tàm sơnam lòt ling. Khà rơwah, hòi lòt ling geh bơyai lơh jăt adăt lòt ling nam 2015, gàr niam broă geh ai, bơta niam, di pal mờ ală broă kờñ bơ̆t bơtàu ling klàng tàm bơta pa; ai geh kwang bàng tàm ală tiah ai ală tiah ngài in. Nàng lơh geh cồng nha broă rơwah, hòi lòt ling nam 2022, Mpồl đơng lam ling klàng ală kấp neh pơlam Ủy ƀân Ñân zân bal mờ kấp bơyai lơh jăt broă dan cih măt tus tơl xã, sơnah ƀòn, thị trấn, ală hìu bơsram kấp 3, hìu bơto broă lơh tàm càr ai jơh ală cau tơl 17 sơnam in. broă rơwah ling geh lơh tơl khà mờ gàr bơta niam tàm nùs nhơm lơh tờm, ndrờm bal, loh làng, ờ do ờ dă, tềm pềr; tơnguh uă kơnòl bơh ală mpồl lơh broă, cau dùl nă să nàng tơnguh uă ngan khà broă rơwah lòt ling.

Jat broă rơndap lơh, 170 nă cau gơ kờn sac rơ wah lòt ling bơh ƀòn dờng Kon Tum, càr Kon Tum dê geh rơndap anih ơm, sàu sa, ơm bal tàm Anih tờm pơlam tàp bơh ngai 11/2 tus ngai jàu dờp ling nam 2022. Tàm tơngai do, ală cau gơ kờn sac rơ wah lòt ling geh tus bal ală broă lơh pơlam tàp bơdìh mờ kơnòl ling klàng bè tàp pràn să jan àng drim, 16 bơta võ tàp pràn să jan àng drim, jơnau sồr pal jat ndau sơ gơn tê gời, pơlam klơp phan, tàp đơs ală jơnau đơs crih mờ siăt sŏ jat jơnau sồr tàm ling klàng; mờ kung bơyai lơh ală broă lơh nhơl ñŏ, lơh prài bồ tơngoh lơh gơlik nùs nhơm chờ hờp ai ală klau pơnu in lài mờ tŭ lòt gùng lơh kơnòl ling klàng. Mờ bơta lơh ngan bơh kấp ủy, gơnoar atbồ mờ Mpồl duh broă kơnòl ling klàng ƀòn dờng Kon Tum dê tàm broă lơh atbồ, tam cah is tơrgùm bal cau lài mờ tŭ lòt ling, geh pơgồp bơnah nàng Kon Tum lơh gơs niam broă lơh rơ wah ling nam 2022.

Cau mblàng K’Duẩn mờ Ndong Brawl