Dilah bè tơngai lài do uă kwang bàng, cau ling sền gàr tiah nhàr lơgar geh làng bol kờñ gơboh hòi là “Cau pơgru cèng griăt tơlir”, den tŭ do khi là cau bèp bơh uă kơnòm dềt kòn ròng Pôs đồng ling sền gàr tiah nhàr lơgar dê mờ dong kờl ai uă kơnòm dềt geh rài kis kal ke geh pơn jat tai lòt bơsram tàm hìu bơsram.

Tơnơ̆ gơbàn bèp chơ̆t, cau mè sang lời oh A Ứng, kòn cau Jrai, hìu ơm tàm ƀòn Grập, xã tiah nhàr lơgar Mo Rai, kơnhoàl Sa Thầy, càr Kon Tum geh kwang bàng, cau ling Pôs đồng ling sền gàr tiah nhàr lơgar Mo Rai dờp rê lơh kòn ròng. Lòt gan rlau 4  nam, tŭ do A Ứng neh bơsram ơdŭ 7 mờ mờng kwèng mờ rài kis, kơrnoat pal jat tàm Pôs đồng ling sền gàr tiah nhàr lơgar dê. A Ứng kung neh lơh jat 11 jơnau pal jat tàm ngai mờ 3 jơnau pal jat tàm poh ndrờm bè dùl nă cau ling geh griăt sơl. Bơh dùl nă kơnòm dềt ờ khin ngan, kơnòm geh kwang bàng, cau ling Pôs đồng ling sền gàr tiah nhàr lơgar Mo Rai sền gròi, pơn dờm pơnđiang, pơn jờng oh A Ứng ngai sơlơ pin dờn rlau. Oh A Ứng đơs: “Pah ngai ală bi sền gròi tus mờ sau, ală bi trŭ gơm piang ai sau in sào. Sau sào jơh den rê bơsram sră. Ru den sau pơs wàl cơldŭ ơm, dong ală bi lơh broă. Sau kờñ ngan bơsram môn Toán, jơnau kơ̆p kờñ bơh sau dê tơnơ̆ do geh lơh cau ling bè ală wa sơl nàng sền gàr tiah nhàr lơgar”.

Là cau geh Kwang atbồ Pôs đồng ling sền gàr tiah nhàr lơgar Mo Rai jàu kơnòl broă pah ngai jun rò, bơto pơlam, bơto tơn ai sau A Ứng in bơsram sră, Trung úy Hoàng Như Thanh, Kwang atbồ mpồl phàu crong pà gĭt: A Ứng geh bồ tơngoh jak ngan, tryang tryồng ngan bơsram sră. Nàng lơh sir kơnòl broă bơh dùl nă cau Bèp geh jàu, Trung úy Hoàng Như Thanh neh pal jòi gĭt is broă lùp bơsram nàng geh tai bơta gĭt wă ròng siam mờ bơto bơtê kơnòm dềt. Trung úy Hoàng Như Thanh, đơs: “Añ den pa rơ̆p lik klờng pa mìng 23 sơnam lơm, ờ hềt tŭ lơi tàm gơnoar broă lơh cau Bèp bơh kơnòm dềt, kung ờ hềt kơlôi tus sơl, mơya mờ broă lơh, kơnòl gơwèt mờ sau den añ kung pơn đơl pràn lơh ngan. Añ kung lùp bơsram, jòi gĭt ală broă bơto bơtê kơnòm dềt bơh tŭ gam dềt. Tus tơngai lơi, pal bơto sau ală bơta lơi den jơnau gĭt wă lơh bè lơi den añ kung pơnđơl pràn lơh ngan nàng jòi gĭt, pơgồp bal mờ pah ngai tàm mpồl ling dê ală bi, ală wa bơto bơtê tai sơl”.

Tus tŭ do neh geh 14 Pôs đồng ling sền gàr tiah nhàr lơgar tàm càr Kon Tum dờp ròng 15 nă sau dềt lơh kòn ròng. Ală sau ndrờm là kơnòm kòn đời geh rài kis sơnđàc sơngĭt ngan. Gơwèt mờ ală kơnòm bơsram rài kis hìu bơnhă kal ke, geh nùs nhơm brồ guh tàm broă bơsram sră, lơh jat broă lơh “Dong kờl oh lòt bơsram”, kwang bàng, cau ling sền gàr tiah nhàr lơgar Kon Tum neh dờp ròng siam 75 nă sau, pah nhai dong kờl tơl nă sau 500 rơbô đong.

Bal mờ broă lơh “dong kờl oh lòt bơsram- Kòn ròng Pôs đồng ling sền gàr tiah nhàr lơgar”, tàm ală nam do Kwang bàng, cau ling sền gàr tiah nhàr lơgar càr Kon Tum gam dong kờl uă kơnòm bơsram tàm 13 xã tiah nhàr lơgar bơh càr dê pơn jat tai lơh jat jơnau kơ̆p kờñ lòt bơsram bơh broă lơh dong kờl di tŭ mờ ală broă lơh geh ngan. Bi Y Ly, kòn cau B’râu, hìu ơm tàm ƀòn Đăk Mế, xã Pờ Y, kơnhoàl Ngọc Hồi, pà gĭt, dilah ờ geh bơta dong kờl bơh Pôs đồng ling sền gàr tiah nhàr lơgar Mpồng tiah nhàr lơgar Dunia Bờ Y dê, kòn ùr bi là sau Y Uyên tŭ do gam bơsram ơdŭ 8 ngan ngồn là pal ơm rlô bơsram rao. Bi Y Ly, đơs: “ Ală bi dong kờl priă bơsram ai sau in mờ priă sa sào, kòi phe ală bi blơi jơh tơn. Hìu bơnhă oh kung ngan ngồn ưn ngài ală bi. Bàr nă ùr bơklau oh kung sồr sau bơsram sră tus gùng tus dà nàng ờ lơh muăt jrùm nùs nhơm ală bi neh dong kờl”.

Bơh bơta sền gròi, dong kờl, pơndờm pơnđiang bơh Kwang bàng, cau ling sền gàr tiah nhàr lơgar càr Kon Tum, ală sau là kòn ròng Pôs đồng ling sền gàr tiah nhàr lơgar, gơwèt Broă lơh “Dong kờl oh lòt bơsram” geh rài kis kal ke ndrờm tryang tryồng mờ geh uă bơta pơnđơl pràn lơh ngan tàm broă bơsram sră. Tàm sùm ală nam do bal mờ kơnòl broă atbồ, sền gàr gơnoar tờm gùng tiah nhàr lơgar bơh Dà lơgar dê jòng rlau 292 kơi sồ rềp nhàr bal mờ 2 lơgar Lào mờ Campuchia, mpồl ling sền gàr tiah nhàr lơgar càr Kon Tum gam geh tă pơgồp kwơ màng ngan gơwèt mờ broă lơh “Bơto kòn bơnus” tiah nhàr lơgar Dà lơgar dê.