Lơh broă mờ nting bơr gờm chờ sa tềp Đảng ƀộ, gơnoar atbồ mờ làng bol càr Tây Ninh, Tổng Ƀí thư ồng Tô Lâm pơyua tus ală kwang đơng lam bồ dờng sơnam, ală Mè Việt Nam khin cha jak chài, ală Cau khin cha jak chài mpồl phàu crong làng bol, Cau khin cha jak chài lơh broă bal mờ jơh gùt mpồl kwang bàng, cau ling mpồl phàu crong mờ làng bol càr Tây Ninh jơnau lùp còp đề mềr, jơnau kah ưn ngài uă ngan mờ jơnau nting bơr gờm chờ nam pa bềng pràn kơldang să jan, gơboh gơbài, lơh geh cồng nha.

Tổng Ƀí thư ồng Tô Lâm đơs loh, bơh tŭ do tus nam 2030, mờ ngài rlau là tus nam 2045 geh gơtha là bơnàng jă sơn rờp gơ wèt mờ bơta bơtàu tơnguh bơh dà lơgar dê. Tàm tŭ tơngai hơ̆, Tây Ninh geh gơnoar broă kuơmàng ngan, ờ mìng gơ wèt mờ bơta bơtàu tơnguh bơh mìng is càr dê, mờ gam gơ wèt mờ jơh gùt tiah do mờ gùt lơgar tai. Tây Ninh geh ù tiah nhàr lơgar kơ̆ kơljap, là rơbàng tàm pơn jat tai kuơmàng ngan đah tiah đah jum mat tơngai lik dà lơgar mờ tiah đah jum tàm gùl lơgar; mờ gam là ù tiah sền gàr kơnhăp kơ̆, ring lơngai, lơh bơyô, mờ là ù tiah bơtàu tơnguh pa bè lơh sa mờ măi mok, kă bro phan, broă drơng ala, logistics, lơh sa mpồng nhàr lơgar. Tổng Ƀí thư ồng Tô Lâm sồr, càr bơyai lơh niam dơ̆ tĕ khà cau ala mat Quôk hội khoă XVI mờ cau ala mat Mpồl duh broă Làng bol ală kâp, tơngai lơh broă bơh nam 2026 tus nam 2031;sac rơ wah ală cau ala mat ngan ngồn pơn rơ jak, ala mat ai nùs nhơm, bơta kơp kờñ bơh làng bol dê in, pơgồp bơnah tơnguh bơta niam lơh broă bơh anih lơh broă làng bol pồ dê; mờ tơrgùm sền gàr kơ̆ dà lơgar, lơngăp lơngai, gàr niam rơndap tap sèng lơngap lơngai mpồl bơtiàn, ngan là tàm tiah nhàr lơgar, bơt bơtàu gùng nhàr lơgar ring lơngai, lơh bơyô, lơh broă bal mờ bơtàu tơnguh.