Mờ nùs nhơm geh kơnòl uă, ală cau ala mat Mpồl duh broă Làng bol càr Gia Lai neh kơlôi sơnơng, cribơyai mờ ring bal 21 jơnau lơh nền tàm pơrjum kuơmàng, tàm hơ̆ geh 2 jơnau lơh nền tàm pơrjum gơ rềng tus broă lơh kwang bàng, 7 jơnau lơh nền tàm pơrjum bè gùng dà broă lơh tam gơl jơnau kờñ ngui ù brê gơ gơs jơnau kờñ ndai nàng lam lơh ală rơndap broă lơh tàm càr, mờ kờp jơh bă ù rlau 161 lồ brê; ală jơnau lơh nền tàm pơrjum geh ai lơh jat ngan ngồn bơh ngai 09/02/2026.

Đơs tơn jơh dơ̆ pơrjum, Phó Ƀí thư Duh broă sùm Tỉñ ủy, Củ tịc Mpồl duh broă Làng bol càr Gia Lai ồng Rah Lan Chung đơs sùm, tơnơ̆ dơ̆ pơrjum do, bal mờ broă lam lơh jat jơnau lơh nền tàm pơrjum dờng cau ala mat gùt lơgar dơ̆ XIV bơh Đảng dê mờ jơnau lơh nền tàm pơrjum dờng Đảng ƀộ càr dơ̆ 1, Anih duh broă Làng bol càr, ală sờh, gah broă lơh mờ ƀòn lơgar kờñ pal tơrgùm lam lơh geh cồng nha ală kơnòl broă tờm, gàr ală jơnau lơh nền tàm pơrjum mhar ngui tàm rài kis.