Ồng Điểu Ngăm (66 sơnam, kòn cau M’nông, ơm tàm ƀòn Bu Gia, sàh Quảng Trực) pà gĭt, ală ngai do ồng sùm tus hìu Niam chài mpồl bơtiàn ƀòn nàng jòi gĭt mat cau ala mat tơlik mat tĕ khà Mpồl duh broă Làng bol sàh, tơngai lơh broă tus.

Jat ồng Điểu Ngăm, ală cau tơlik mat tĕ khà ndrờm geh bơsram uă, lơh uă broă lơh lơh broă geh ngan jŏ jòng, den tàng ồng kơ̆p kờñ rơ wah geh cau geh tơl nùs nhơm niam, cau geh bồ tơngoh jak, ngan ngồn là cau ala mat bơh làng bol dê, là rơbàng tàm tơrbŏ đah Đảng, Dà lơgar mờ Làng bol, pơgồp bơnah ai ală broă lơh bè bơt bơtàu tiah nhàr lơgar ngai sơlơ pas niam mờ niam jak:“Añ deh mờ dờng tàm do. Bàr pe ngai do, ngai lơi añ kung tus Hìu niam chài ƀòn dê nàng sền mat cau ala mat cau tơlik mat tĕ khà Mpồl duh broă Làng bol sàh. Añ chờ hờp ngan mờ pơn yờ să tŭ geh lòt đùh sră, kơ̆p kờñ pồ geh cau “chài  đơs”, ngan ngồn ala mat ai ƀòn in, pơgồp bơnah lam ƀòn lơgar Quảng Trực ngai sơlơ bơtàu tơnguh”.

 Bi Thị Huynh (kòn cau M’nông),  Lam bồ Mpồl tĕ khà sồ 2, ƀòn Bu Prâng 2, sàh Quảng Trực pà gĭt, mpồl tĕ khà geh pơgăp 300 nă cau tĕ khà, 98% là kòn cau M’nông. Tơnơ̆ pơrjum bơyai dơ̆ 2 (ngai 3/2), bi bal mờ 8 nă đảng viên tàm ƀòn jơh nùs mblàng yal, yal tơngĭt Adat Tĕ khà, bơto pơlam cau tĕ khà in jòi gĭt tơl làm rài kis, broă lơh lơh broă bơh ală cau tơlik mat tĕ khà dê, nàng kờñ gàr niam broă tus bal tĕ khà di adat, làng bol lơh tờm, rơwah geh ală cau jak chài, di pal ala mat ai nùs nhơm mờ bơta kơ̆p kờñ bơh làng bol dê.

Bi Lê Thị Huynh pà git: “Tŭ do, Hìu niam chài  mpồl bơtiàn ƀòn neh lĭp sră cih mat cau tơlik mat tĕ khà Mpồl duh broă Làng bol sàh nàng làng bol in jat sền, rơwah ală cau ala mat geh tơl nùs nhơm niam, tơl jak chài, lơh rƀàng tàm tơrbŏ bal đah Làng bol, Đảng mờ Dà lơgar. Bơh hơ̆, pơgồp bơnah ai ală broă lơh dong kờl bơh kấp hơđang dê bè bơcri priă, bơt bơtàu dong ƀòn bal mờ làng bol ngai sơlơ bơtàu tơnguh”.

Dơ̆ tĕ khà Cau ala mat Quôk hội khoă 16 mờ cau ala mat Mpồl duh broă Làng bol ală kấp, tơngai lơh broă bơh nam 2026–2031, sàh tiah nhàr lơgar Quảng Trực geh rlau 7 rơbô 200 nă cau tĕ khà, lòt đùh sră tàm 12 tiah tĕ khà gơwèt 11 ƀòn mờ Trung đoàn 726. Ồng Đoàn Lê Anh, Củ tịc Anih duh broă Mặt trận Dà lơgar Việt Nam sàh Quảng Trực, pà gĭt, broă lơh gàr niam lơngăp lơngai rơndăp tăp sèng, ai ală tiah tĕ khà, rcang ală broă rơndăp lơh, hòm đùh sră mờ ală bơta drơng dơ̆ tĕ khà neh geh lam lơh dồ ròt bal, niam ngan, crăp rcang ai ngai tĕ khà in. Tŭ do tiah do gam lơh sir jơh ală broă lơh dŭt ndơl, rcang ai dơ̆ pơrjum bơyai dŭt ndơl, lơh tus cih mat cau tơlik mat tĕ khà ngan ngồn cau ala mat Mpồl duh broă Làng bol sàh tàm tơngai lơh broă tus.

Ồng Đoàn Lê Anh, pà gĭt: “Tĕ khà tơngai lơh broă bơh nam 2026–2031, bol añ gam pơgồp bal mờ ală mpồl lơh broă nàng kơ̆p tơnơ̆ Pơrjum bơyai bal dơ̆ 3 pơn jat tai cih mat cau tơlik mat tĕ khà Cau ala mat Quôk hội kung bè Cau ala mat Mpồl duh broă Làng bol càr dê pơyoa tàm ală tiah, nàng lam lơh tơl làm ală sră nggal pơn jat tai, gàr niam broă lơh tĕ khà geh lơh jat di mờ jơnau sồr dê. Mìng is gơwèt mờ Mpồl duh broă Làng bol sàh, tŭ do bol añ gam kờp sền, rcang nàng tàm dơ̆ Pơrjum tàm bơyai bal dŭt ndơl cih nền mat bơh 40 nă cau ala mat kờp dŭ lài gơmù gam 33 nă cau, lơh tus pồ 20 nă cau ala mat Mpồl duh broă Làng bol sàh ngan ngồn ai tơngai lơh broă tus in".

Mờ bơta crang lài di ngan, niam ngan, dơ̆ tĕ khà tàm sàh tiah nhàr lơgar Quảng Trực pin dờn rơ̆p geh bơyai lơh làng bol lơh tờm, di mờ jơnau sồr, lơh geh nùs nhơm brơn brài tàm làng bol. Làng bol kòn cau M’nông pơyoa wil tơl bơta pin dờn tàm sră đùh, kơ̆p kờñ rơwah geh ală cau ala mat geh tơl nùs nhơm niam, geh tơl jak chài, rềp làng bol in wă làng bol. Bơh hơ̆, pơgồp bơnah bơt bơtàu ƀòn lơgar Quảng Trực ngai sơlơ pas niam mờ niam jak.