Ồng Y Bhiu Byă, 68 sơnam là Phó Ƀí thư Ci ƀộ, Kwang ătbồ ƀòn Tơng Jú, xã Ea Kao, ƀòn dờng Buôn Ma Thuột kung là dùl nă cau lơh broă sa geh bơngă pin dờn. Tàm bă ù 1 lồ 2 sàu bơh hìu bơnhă dê, ồng tam 900 tờm kơphê, lơh ală wàng ròng sur, iar, pah nam lơh geh rlau 4 tấn kơphê gar, bal mờ bơh 70 tus 80 tơlak đong priă bơh tăc sur, iar. Gŏ broă lơh lơh sa ròng phan, tam phan bơh hìu bơnhă ồng dê lơh geh cồng nha, uă hìu làng bol tàm ƀòn neh lùp bơsram lơh jăt bal. Broă mblàng yal, hòi jà làng bol tam gơl bồ tơngoh kơlôi sơnơng, broă lơh kung bơh hơ̆ mờ ƀươn soh. Ồng Y Bhiu Byă yal: Kơnòl bơh añ dê là mblàng yal, hòi jà làng bol tàm ƀòn lơh jăt gùng dà, jơnau sồr bơh Đảng dê, gùng dà broă lơh adat boh lam bơh Dà lơgar dê. Bơh hơ̆, tơnguh uă bơta gĭt wă bơh làng bol dê. Làng bol tàm ƀòn pal tam klăc, oh kòn kòn sau tàm jơi nòi ờ lời gơlik geh jơnau bau gờñ, tơrgùm lơh sa bơtàu tơnguh lơh sa tơnguh uă priă lơh geh, tă pơgồp bơ̆t bơtàu ƀòn lơgar pa tơnguh jơnhoa ai xã in.

Đảng viên ồng Y Tuyên B’Krông là Kwang ătbồ ƀòn Dray Hling, xã Hoà Xuân, ƀòn dờng Buôn Ma Thuột. “Bơr đơs tê lơh”, ồng lơh krơh bơtàu tơnguh lơh sa hìu bơnhă mơkung hòi jà làng bol tàm ƀòn tàm pơrlòng lơh sa, tă pơgồp bơ̆t bơtàu ƀòn lơgar pa. Jăt ồng Y Tuyên yal, tàm broă lơh mblàng yal, hòi jà lơh jăt ală gùng dà, jơnau sồr, broă lơh bơh Đảng dê, cau kwang bàng, đảng viên pal kràñ cê kơ̆ nùs. Ồng Y Tuyên B’Krông, đơs: He tus jà khi dơ̆ sơnrờp ờ gŏ bài kờñ iăt, tài bơh ù, drà kă bro tŭ hơ̆ giă jơnhoa. He ờ sơrbì ờ, dơ̆ dùl ờ gơtùi, den lòt tai dơ̆ 2, dơ̆ 3....Tus mblàng đơs nàng khi in gĭt geh dilah gùng geh lơh ơnàng den giă ù gơguh tai, lòt rê ƀươn ƀoài, kong hoàc hươr dùl êt bơh sơnrờp mờ geh bơta kwơ dờng. Tơnơ̆ hơ̆, khi iăt jăt.

Ƀòn dờng Buôn Ma Thuột, càr Dăk Lăk tŭ do geh 376 rbô nă làng bol, tàm hơ̆ 15 rbô 140 nă đảng viên. Đảng viên là cau jơi bơtiàn dùl êt nă cau geh rlau 1 rbô nă, tàm hơ̆ uă ngan là đảng viên kòn cau Rơđê. Uă ngan đảng viên cau kòn cau Rơđê tŭ do gam pơrjum tàm 33 chi ƀộ ƀòn, tàm hơ̆ 15 nă cau là Ƀí thư Ci ƀộ, 19 nă là Phó Ƀí thư, mờ 31 nă lơh broă tàm kâp ủy.

Jăt ồng Trần Vũ Cường, Kwang ătbồ Mpồl Rơndăp broă Thàñ ủy Buôn Ma Thuột dê yal, ală nam do, gơnoar broă bơh ală đảng viên cau jơi bơtiàn dùl êt nă cau pơrjum tàm ală ƀòn sùm lơh jăt niam gơnoar broă lam lài lơh krơh tàm jơh ală broă. Ală đảng viên là ală cau mblàng yal jơnau jak chài ngan, hòi jà làng bol lơh jăt niam jơnau sồr, gùng dà bơh Đảng dê, ală jơnau cih tàm adat boh lam bơh Dà lơgar dê. Tàm hơ̆, pơnrơ là ală srơh tàm pơrlòng bơtàu tơnguh lơh sa, pơgồp bal mờ ƀan ngàñ mpồl cau tàm tiah he dê lơh geh jơnau pơrgon ƀòn, jơnau pal jăt tơrgùm tàm bơ̆t bơtàu rài kis niam chài tiah ơm kis, lơngăp lơngai rơndăp tăp sèng, bơ̆t bơtàu ƀòn lơgar pa, sền gàr tiah ơm kis.

Ồng Trần Vũ Cường pà gĭt, tơngai tus, Thàñ ủy Buôn Ma Thuột, càr Dăk Lăk pà gĭt, nàng kờñ lơh niam rlau tai gơnoar broă lam lài lơh krơh bơh đảng viên cau jơi bơtiàn dùl êt nă cau dê, Thàñ ủy Buôn Ma Thuột rơ̆p pơn jăt tai lam lơh broă rơndăp lơh tề lam kâp ủy, ală oh mi là Ƀí thư, Phó Ƀí thư Ci ƀộ bè ală đah broă lơh bơh Đảng dê. Ồng Trần Vũ Cường, đơs: Thàñ ủy sền gròi ngan tus broă lơh bơto bơtê cíñ trị, bồ tơngoh ai kwang bàng kâp ủy in, ală oh mi là Ƀí thư, Phó Ƀí thư mờ đảng viên tàm ală Ci ƀộ in, kwơmàng là ală Ci ƀộ tàm tiah làng bol jơi bơtiàn dùl êt nă cau. Ờs mờng pah dơ̆, bol añ ndrờm geh broă rơndăp lơh bơto pơlam, lơh pràn broă lơh hòi jà làng bol bal mờ ală Ci ƀộ kơnă hơđơm lơh jăt niam gùng dà, broă lơh, jơnau sồr bơh Đảng dê, adat boh lam bơh Dà lơgar dê.

Củ tịc Hồ Chí Minh neh geh tŭ đơs nền: “Ci ƀộ là bơnàng jă bơh Đảng dê, Ci ƀộ niam den jơh ală broă rơ̆p niam”. Ală đảng viên tàm ală ƀòn kòn cau Rơđê, ƀòn dờng Buôn Ma Thuột, càr Dăk Lăk gam lơh jăt geh cồng nha jơnau bơto sồr bơh Wa Hồ dê.