Tơnơ̆ uă jiơ ờ ru ngan mờ broă lơh sră pơ àr tàm cơldŭ lơh broă dùl mpồng xã Ea Tul, đảng viên ồng Y Dũng Hwing đềt mềr tai mờ mpồl sền gàr is gàr niam lơngăp lơngai rơndăp tăp sèng ƀòn Tu mờ sơngka sền gàr niam 8 sàu sầu riêng hìu bơnhă dê. Ngac ngar jơh nùs jơh tồr tàm jơh ală broă, jơh nùs tus bal lơh broă mpồl bơtiàn, ală tă pơgồp bơh ồng Y Dũng dê neh geh cih dờp mờ jờng rơ tàm “Ngai chờ jơh gùt làng bol sền gàr Lơngăp lơngai Dà lơgar xã Ea Tul nam 2023” pa geh lơh tàm poh lài. Đảng viên ồng Y Dũng Hwing yal: Mờ gơnoar broă là đảng viên, să tờm añ lơh broă tàm ƀòn nàng geh rài kis bơtàu tơnguh, añ lơh ngan jơh nùs jơh pràn he dê tàm broă lơh, rơndăp tăp sèng tŭ jiơ lơh broă hìu mờ lơh broă dà lơgar dê. Añ tam sơl 8 sàu sầu riêng bơh nam 2017, nam do geh giă den tàng añ kơlôi là digơlan geh rlau 1 tơmàn đong. Mờ gơnoar broă là Ƀí thư Ci ƀộ, añ lơh krơh ai làng bol in, hòi jà làng bol tă pơgồp priă jền nàng crăp măy camera lơngăp lơngai bơdìh gùng nàng kờñ sền gàr jơtài làng bol he dê tàm kàl tơnhàu phan tam. Bơh hơ̆, làng bol kung tă pơgồp sơl mờ crăp 9 nơm măy camera lơngăp lơngai tàm ƀòn Tu. Tŭ do, den tàm ƀòn ờ gam tai jơnau tung kơñau bè lài.

Kung tài bơh rài kis lơngăp lơngai bơh làng bol ƀòn lơgar Ea Tul dê, đảng viên, kra ƀòn ồng Y Đhé Ayun ơm tàm ƀòn Phơng sùm tơryăng tơryồng, kong bòl glar kal ke, lơh krơh tàm jơh ală broă. Ồng pà gĭt, ù tiah jơtài neh tam pà ai ală kòn in, tŭ do ùr bơklau ồng mìng gàr wơl 2 lồ kơphê, tiêu mờ sầu riêng, priă lơh geh pah nam pơgăp 400 tơlak đong. Bal mờ lơh sa jak, ồng kung jơh nùs mblàng yal hòi jà làng bol tơryăng tơryồng lơh sa, bơ̆t bơtàu ƀòn lơgar kơ̆ kơl jăp bơtàu tơnguh. Ồng Y Đhé Ayun, đơs: Đảng viên là cau lam lài, lơh krơh ai jơh tơl nă cau in mờ hòi jà làng bol, bè hơ̆ làng bol hơ̆ sồng lơh bal. Cau geh bơngă pin dờn là hìu bơnhă, jơh dùl hìu bơnhă  ndrờm lơh ngan lơh broă ai rài kis tŭ do in. Bơh tŭ añ lơh kwang bàng tus tŭ rê rlô lơh broă den sùm sùm geh bơta lơh ngan lơh broă mờ bơtàu tơnguh lơh sa hìu bơnhă, dong ai làng bol mờ hìu bơnhă in lơh jăt he; lơh ngan bơto tơngkah làng bol lơh jăt ală gùng dà, jơnau sồr bơh Dà lơgar dê, ờ lời làng bol lơh tìs adat boh lam, mblàng yal lơh jăt gùng dà jơnau sồr bơh Đảng dê, adat boh lam bơh Dà lơgar dê, sền gàr rơndăp tăp sèng lơngăp lơngai tàm ƀòn, lơh di adat boh lam bơh Dà lơgar dê.

Ea Tul là dùl tàm 5 xã bơh sơnrờp lơh jơh ală broă jàu bơ̆t bơtàu ƀòn lơgar pa bơh càr Dăk Lăk dê bơh nam 2016. Tŭ do, jơh gùt xã geh rlau 2 rbô 870 hìu mờ 12 rbô 800 nă làng bol, tàm hơ̆ làng bol kòn cau Rơđê geh tus 97%. Khà hìu rƀah bơh xã dê mìng gam 3,12%, lơyah ngan rlau jơh kơnhoàl Cư Mgar dê. Đảng ƀộ xã Ea Tul tŭ do geh 222 nă đảng viên pơrjum tàm 18 ci ƀộ đảng ƀòn lơgar, tàm hơ̆ geh 137 nă đảng viên kòn cau Rơđê, geh tus mờr 62%, jơnhoa ngan rlau jơh càr Dăk Lăk dê. Ồng Y Uốt Ayun, Ƀí thư Đảng ủy xã Ea Tul, pà gĭt: ală nam do, ală đảng viên ndrờm tơngŏ geh gơnoar broă lam lài lơh krơh tàm lơh broă lơh sa, sền gàr lơngăp lơngai rơndăp tăp sèng tàm tiah ơm kis. Tàm hơ̆, pơnrơ ngan là ồng Y Đhé Ayun mờ Y Dũng Hwing, neh lơh gơlik bơta pràn lơh gơrề pràn kơldang tàm ală srơh tàm pơrlòng kờñ gơboh ƀòn lơgar tàm tiah do dê. Ồng Y Uốt Ayun, Ƀí thư Đảng ủy xã Ea Tul, kơnhoàl Cư Mgar, đơs: Bèp Chen neh geh tŭ lơh kwang bàng xã, tus tŭ rê mờ ƀòn lơgar kung tơryăng tơryồng lơh broă, là cau geh bơngă pin dờn tàm ƀòn lơgar, lơh broă ndang, hòi jà làng bol tơryăng tơryồng lơh broă lơh sa ndang, kis niam bơnĕ, ờ gŏ lơh broă lơh tìs ờ di mờ adat boh lam bơh dà lơgar dê. Dơ̆ 2 là ồng Y Dũng Hwing là kwang bàng lơh broă sền gàr adat boh lam xã dê, là dùl nă cau sơrbac mhar mờ gĭt wă, bi Y Dũng tam tờm sầu riêng, dùl nam lơh geh bơh 200 tus 300 tơlak đong. Làng bol kung lùp bơsram lơh jăt broă lơh bơh Y Dũng dê, mờ xã kung pồ bi lơh Ƀí thư Ci ƀộ, bi sùm là cau lam lài, bơh hơ̆ jơh ală làng bol ƀòn lơgar ndrờm lơh jăt bal.

Mờ ală cồng nha lơh geh pơnrơ ngan tàm broă lơh, srơh lơh sa jak kung bè lơh broă mpồl bơtiàn, ală đảng viên ồng Y Dũng Hwing, Y Đhé Ayun neh uă dơ̆ geh ală kâp ală gah lơh broă jờng rơ. Kwơmàng tàm Ngai chờ Jơh gùt làng bol sền gàr Lơngăp lơngai Dà lơgar nam 2023 tàm xã Ea Tul geh bơta tus bal bơh Phó Thủ tướng Cíñ phủ ồng Trần Lưu Quang dê, jơh bal ồng Y Dũng Hwing mờ Y Đhé Ayun ndrờm chờ hờp geh jờng rơ. Ală bơta pơndờm pơnđiang pơnjờng hơ̆ sơlơ bơtơl tai bơta gơn kơnờm nàng ală đảng viên là cau jơi bơtiàn dùl êt nă cau bè Y Dũng mờ Y Đhé pơn jăt tai pơđơl pràn, lơh ngan bơ̆t bơtàu rài kis hìu bơnhă bơtàu tơnguh sùm, làng bol ngai sơlơ pas sơm niam bơnĕ.