Bơh ngai geh ală kwang bàng đảng viên tus tơn tàm hìu hòi jà tam gơl bă kơphê kra jŏ sơnam gơ ai cồng nha lơh geh ờ huan uă nàng tam biăp, bơkàu mờ zơu tây, hìu bơnhă ồng Liêng Hót Ha Linh ơm tàm thôn Dà Tro, xã Dà Nhim, kơnhòal Lạc Dương, càr Lâm Đồng neh khin cha lơh jăt mờ cèng wơl cồng nha priă lơh geh uă ai hìu bơnhă in. Ồng Liêng Hót Ha Linh pà gĭt, 6 sào biăp, bơkàu mờ zơu tây geh hìu bơnhă tam jăt gùng dà lơh broă sa sươn sre măy mŏk pa den tàng drà tăc geh sùm, kờp bal pah nam gơ ai priă jền ai hìu bơnhă ồng in rlau 500 tơlak đong. Ồng Liêng Hót Ha Linh, đơs: Kơnờm ală kwang bàng, đảng viên, gơnoar ătbồ tus mblàng yal, hòi jà tam gơl rơndăp tăp sèng chi tam, mơkung pờ ală ơdŭ bơto pơlam, tàm jàu bơta chài tam phan, hìu bơnhă añ neh khin cha tam gơl dồ bơnah bă kơphê nàng lời ù tam wơl zơu tây, tam bơkàu tàm hìu krơh. Bơh hơ̆, priă lơh geh bơh lơh sa bơh hìu bơnhă dê geh uă rlau, uă rlau tus uă dơ̆ pơndrờm mờ lài do. Kung bơh hơ̆, să tờm mờ làng bol tàm ƀòn hơ̆ sồng gĭt geh tam phan bè lơi hơ̆ sồng geh cồng nha, ai lơh sa hìu bơnhă dê bơtàu tơnguh rlau tai.

Jăt đảng viên bi Cil Pam Ka Duyên gơ wèt Ci ƀộ thôn Dà Tro, nàng làng bol in dòn mờ khin cha tam gơl bồ tơngoh tam phan, tam gơl rơndăp tăp sèng chi tam, ai ală sơntìl chi tam pa nàng tam, tơnguh uă priă lơh geh den tơl nă đảng viên tàm ci ƀộ pal là cau lam lài lơh krơh. Geh cau ngan, broă ngan den broă lơh mblàng yal, hòi jà lơh jăt ală gùng dà, jơnau sồr, broă dong kờl bơh Đảng dê mờ adăt boh lam bơh Dà lơgar dê hơ̆ sồng cèng wơl cồng nha niam, làng bol hơ̆ sồng jăt ngui lơh jăt. Mìng is să tờm he, Cil Pam Ka Duyên neh lơh geh dồ broă pơlam tam zơu tây nàng làng bol tàm thôn in tus sền mờ bơsram. Bi Cil Pam Ka Duyên, đơs: Tŭ gơgơs là đảng viên, añ geh tai tŭ niam nàng gĭt wă loh làng rlau bè ală jơnau sồr, gùng dà Đảng dê, broă dong kờl mờ adăt boh lam Dà lơgar dê. Kơnờm bè hơ̆, añ hơ̆ sồng gơtùi lơh niam broă geh Đảng ủy, gơnoar ătbồ dê jàu. Mờ kung bơh hơ̆, añ dong làng bol he geh uă rlau tai. Mùl màl, hòi jà làng bol tam gơl chi tam, lơh ngan tam tai tờm chi tam lơyah ngai nàng bơtàu tơnguh lơh sa hìu bơnhă in. Tŭ do, rài kis làng bol jơi bơtìan dồ êt nă cau dê tàm tiah do neh ờ huan tai đau kal ke uă ngan rlau pơndrờm mờ lài.

Ờ mìng thôn Dà Tro lơm, uă đảng viên ndai tàm ală thôn, ƀòn bơh xã Dà Nhim dê kung gĭt wă geh gơnoar broă mờ kơnòl broă bơh he dê tàm broă lam lài lòt lài tàm jơh ală broă. Tàm hơ̆ pal kờp tus ală srơh tam gơl rơndăp tăp sèng chi tam, tàm dong kờl gơ̆p bơtàu tơngguh lơh sa, dong kờl ngai lơh broă, sơntìl chi tam, bơta chài tam phan…Kơnờm bơh hơ̆, lơh gơlik phan bơh lơh broă sa sươn sre xã Dà Nhim dê neh tam uă chi tam, rơhời lơh gơlik phan lơh geh bơh sươn sre jăt sră dan blơi phan mờ tơngguh priă jền phan kă bro. Bơh hơ̆, bơh chờm mìng tam kơphê lơm, tus tŭ do, Dà Nhim neh rề ơnàng geh 16 lồ tờm chi lơh sơnơm atiso, 6 lồ zơu tây, 40 lồ bơkàu koh ntê, 300 lồ biăp khuah ală bơta mờ rlau 330 lồ chi sa plai. Jăt Đảng viên bi Cil Pam Ka Phương, Ci ƀộ thôn Darhoa, xã Dà Nhim, kơnhoàl Lạc Dương yal, kờñ lơh geh cồng nha uă tàm broă mblàng yal, hòi jà, jơnau “Đảng viên lòt lài, làng bol ƀòn lơgar lòt jăt tơnơ̆” kờñ pal geh sền gròi mờ lơh jăt niam. Bi Cil Pam Ka Phương, đơs: Bol hi mblàng yal, hòi jà ală hìu bơnhă cau jơi bơtiàn dồ êt nă cau in tàm thôn sền gròi kơlôi rơcăng bơtàu tơngguh lơh sa- mpồl bơtiàn. Bơh lài tus tŭ do, tờm chi tam tờm bơh làng bol dê là kơphê, tŭ do hòi jà tam gơl rơndăp tăp sèng chi tam jăt gùng dà drà kă bro biăp sa, blơn, khuah ală bơta nàng bơtàu tơnguh rlau tai.

Bal mờ bơtàu tơngguh lơh sa, gơnoar broă lam lài, lơh krơh bơh tơl nă đảng viên dê gam geh Đảng ƀộ xã Dà Nhim sền gròi lam lơh jăt geh cồng nha tàm uă gah broă, tàm hơ̆ pal kờp tus ală srơh tàm sơm băt tê bal bơ̆t bơtàu ƀòn lơgar pa, tơrmù rƀah kơ̆ kơl jăp, ngui niam mpồl tam klăc dờng jơh gùt jơi bơtiàn, bơ̆t bơtàu ală anih lơh broă cíñ trị pràn kơldang kơ̆ kơl jăp. Ồng Kon Sơ Ha Vương, Củ tịc Ủy ƀan Mặt trận dà lơgar Việt Nam xã Dà Nhim pà gĭt, ngan bơta do neh dong Dà Nhim sơrbac mhar tơrmù geh jơgloh rƀah, brồ guh gơgơs là xã lơh geh tơl jơnau sồr ƀòn lơgar pa mờ gam bơ̆t bơtàu xã ƀòn lơgar pa gơguh jơnhoa. Ồng Kon Sơ Ha Vương, đơs: Lơh jăt jơnau sồr bơh Đảng dê mờ adăt boh lam bơh Dà lơgar dê, tơngai do, Đảng ủy, gơnoar ătbồ neh mblàng yal làng bol in lơh jăt niam broă lơh bơ̆t bơtàu ƀòn lơgar pa. Mờ jơnau đơs dà lơgar mờ làng bol lơh bal, uă broă bơ̆t bơtàu bè lơh gùng, lơh rbàng, brong dà geh bơcri priă lơh kơl jăp. Bal mờ lơh sa kơ̆ kơl jăp, rài kis phan bơna mờ nùs nhơm làng bol dê neh geh bơtàu tơngguh uă ngan.

Kơnờm ngui niam gơnoar broă bơh đảng viên dê tàm lam lài, lơh krơh, tề lam làng bol lơh jăt geh cồng nha ală broă bơh xã dê lam lơh, lơh sa- mpồl bơtiàn bơh xã Dà Nhim, kơnhoàl Lạc Dương, càr Lâm Đồng dê gam sùm bơtàu tơnguh tai pah ngai.