Tơnơ̆ ală tŭ jơ bơsram sră tàm ơdŭ, oh Y Minh Tuyết, kơnòm bơsram ơdŭ 5B tàm sơnĕ tờm hìu bơsram kâp 3 kòn cau ơm sa ngai kâp 1 Măng Cành, xã Măng Cành. Kơnhoàl Kon Plông sơrbac mhar ràu jơng tê hơ̆ sồng bal mờ 187 nă kơnòm bơsram 8 ơdŭ ndai tơrgùm tàm hìu ƀềp bơh hìu bơsram dê. Biap piang cau pơgru gơm ală oh in klò ngai do geh ka, poac mờ dà biap. Oh Y Minh Tuyết đơs: “Hìu kòn dê tàm ƀòn Măng Cành. Kòñ kờñ ngan ơm wơl tàm hìu bơsram, geh bơto bơtê gơs cau geh kuơ mờ geh sa biap piang bơkah ngan. Tàm do piang biap bơkah rlau tàm hìu tài tàm hìu ờ geh poac ka bè do”.

Nam bơsram 2023- 2024, Hìu bơsram kâp 3 kòn cau ơm sa ngai kâp 1 Măng Cành geh 272 nă kơnòm bơsram, tàm hơ̆ mìng geh 57 nă kơnòm bơsram geh dờp bơta dong kờl jat Nghị địñ sồ 116 nam 2016 bơh Cíñ phủ dê. Tềng đap bơta mùl màl ală kơnòm bơsram gam wơl ờ gơ wèt mpồl geh dờp bơta dong kờl mơya rài kis hìu bơnhă kung gam kal ke, hìu ơm den ngài hìu bơsram tai den tàng Mpồl đơng pơlam hìu bơsram pơn đơl pràn lơh ngan gàr sùm broă sàu sa ngai ai jơh tơl nă ală oh in, kờp bal mờ 85 nă kơnòm bơsram tàm 6 hìu bơsram sơnĕ. Pơgru Trần Thông, atbồ hìu bơsram kâp 3 kòn cau ơm sa ngai kâp 1 Măng Cành pà git, broă pah ngai  lam lơh trŭ gơm phan sa ală kơnòm bơsram in lơh pơgru gơguh uă tai broă, sơlơ bòl glar rlau mơya bơ tơl wơl, ală dơ̆ sàu sa bềng lìu bơta kờñ gơboh neh pơn jờng ală kơnòm bơsram tus ơdŭ, tus hìu bơsram: “Gàr sùm broă sàu sa, ƀùi mho ală kơnòm bơsram dê ƀuơn ngan. Bơta krơi is tàm bơta trồ tiah nhai mìu tŭ ờ geh sa ngai den ƀùi mho ndrờm bè ală oh ờ lòt bơsram tai. Gàr sùm broă sàu sa ngai là broă niam ngan ai broă gàr khà kơnòm bơsram tus ơdŭ bơsram tàm ƀùi mho”.

Bè broă lơh ơm sa ngai, ală kơnòm bơsram gơ wèt cau geh dong kờl jat Nghị địñ sồ 116 nam 2016 bơh Cíñ phủ dê tàm nam bơsram 2023- 2025 kờp dŭ geh 1 rbô 900 nă kơnòm bơsram (geh 829 nă kơnòm bơsram kâp 1, 871 nă kơnòm bơsram kâp 2) gơ wèt 14 hìu bơsram kòn cau ơm sa ngai. Ală hìu bơsram neh rơcang broă rơndap lơh ai ơm sa ngai, cih lài mat phan sa pah ngai. Nàng gơtùi gàr ală dơ̆ sa ngai ai mờr 1 rbô 250 nă kơnòm bơsram ơm sa ngai làng bol ròng tàm 4 xã, thị trấn, geh: Măng Cành, Pờ Ê, Đăk Tăng mờ thị trấn Măng Đen, Gah bơto bơtê mờ bơsam kơnhoàl Kon Plông lam lơh uă broă lơh mờ dờp geh bơta dong kờl bơh gơnoar atbồ, ală mpồl bal kung bè cau geh nùs nhơm niam.

Mùl màl, Rơndap broă lơh “Ròng oh” bơh mpồl lơh broă niam Bơta pin dờn mờ Rơndap broă lơh “Ròng oh Tây Nguyên” dong kờl 397 nă kơnòm bơsram mờ khà dong kờl tơl nă oh 17 rbô đông pah ngai; Kes priă kơnòm bơsramr ƀah tiah kơh bơnơm Rơndap broă lơh “Sàu piang geh poac”, dong kờl biap piang sa ngai ai 850 nă kơnòm bơsram in, tàm hơ̆ kơnòm bơsram mầm non mờ khà dong kờl tơl nă oh 8 rbô đông mờ 438 nă kơnòm bơsram kâp 1, kâp 2 khà dong kờl tơl nă oh là 10 rbô đông.

Bơdìh hơ̆ tai, ală hìu bơsram pơn jat tai hòi jà tă pơgồp bơh uă cau geh nùs nhơm niam, cau dùl nă să, mpồl bal ndai tàm càr mờ bơdìh càr, mè bèp kơnòm bơsram dong kờl phe, biap, kơnuh, trŭ gơm biap piang nàng kờñ tơnguh bơta niam biap piang ai kơnòm bơsram ơm sa ngai làng bol ròng in, lơh gơlik bơta niam ngan rlau jơh nàng ală oh iang nùs bơsram tàm hìu bơsram tàm nam bơsram 2023- 2024. Pơgru Nguyễn Minh Cường, Phó Kwang atbồ Phòng Giáo zụk mờ Đào tạo kơnhoàl Kon Plông pà git, tàm bơta priă jền dong kờl ờ huan geh, nàng gàr bơta niam biap piang sàu sa ai ală oh in, hìu bơsram pal hòi jà tai ală bơnah dong kờl: “Ală kwang atbồ hìu bơsram hòi jà mè bèp kơnòm bơsram tă pơgồp kòi phe, hơ̆ sồng ală bơta biap. Mè bèp lơi ờ geh ală phan hơ̆ den tă pơgồp lòng sing ồs. Ờ geh den tă pơgồp trŭ gơm biap piang, hơ̆ là tus klò ngai mè bèp tus anih hơ̆ nàng trŭ gơm biap piang ală oh in. Ai hòi jà mpồl bơtiàn tă pơgồp den Phòng Giáo zụk bal mờ ală xã, thị trấn, ală kwang atbồ hìu bơsram hòi jà ală cau geh nùs nhơm niam, uă ngan là tă pơgồp mờ phan bơna, pơn yơu bè ƀung mi, ka rì, tơngi”.

Mùl màl ai gŏ, broă gơtùi gàr sùm sa ngai ai mờr 1 rbô 250 nă kơnòm bơsram ơm sa ngai gơ wèt làng bol ròng, kơnòl tờm ngan gơ wèt hờ cau pơgru ală hìu bơsram. Ală dơ̆ sàu sa lơh pơgru sơlơ bòl, mơya bềng lìu bơta kờñ gơboh gam pơgồp bơnah pơn jờng nùs nhơm bơsram sră, dong ală kơnòm bơsram cau Sơdàng tàm kơnhoàl Kon Plông, càr Kon Tum lòt bơsram.