VOV4.K’ho - Wă kơnòm bơsram tus lòt bơsram wơl bơh nggùl nhai 2 nam 2022, ală hìu bơsram mầm nòn tàm ƀòn dờng Pleiku, càr Gai Lai gam pơn jăt tai lơh jăt uă broă lơh nàng gàr niam ờ do ờ dă tàm broă rơcang sơndră mờ kòp kovid-19.

                                       Kơnòm bơsram mầm non pal pơn chèo tàm tŭ bơsram

Bal mờ hơ̆, ală mpồl lơh broă lam sồr cau mè bèp jun kơnòm dềt lòt bơsram, bơ̆t bơtàu wơl rài kis bè ờs pa. Sở Giáo dục mờ Đào tạo càr Gia Lai pà git, tŭ do gùt càr geh 253 tàm 257 hìu bơsram ai kơnòm bơsram mầm non tus lòt bơsram. Bơh mờr 1 poh, neh geh 87% khà kơnòm dềt lòt bơsram. Sền bal, tàm ală kơnhoàl, thị xã, khà kơnòm bơsram mầm non tus lòt bơsram wơl gal ngan. Mờ broă bơto bơsram niam ờ do ờ dă, khà kơnòm bơsram tus lòt bơsram wơl gam geh tơnguh uă pah ngai. Jăt Sở Giáo dục mờ Đào tạo yal, tàm kấp mầm non là kâp bơsram kwơ màng, dong kờl kơnòm dềt tơnguh bơtàu tơl ală bơta ngăc ngar, git wă mờ tơnguh bơtàu nùs nhơm pin dờn ai kơnòm dềt in lài mờ tŭ mŭt ơdŭ 1. Den tàng, broă ai kơnòm dềt tus lòt bơsram wơl là bơta pal geh.

Cau mblàng Ndong Brawl