VOV4.K’ho-Tềng đap dơ̆ sơnđờm mŭt nam bơsram pa, Củ tịc lơgar ồng Nguyễn Xuân Phúc neh pơyoa sră ai gah bơto bơtê in. Tàm dơ̆ sơnđờm mŭt nam bơsram pa drim do ngai 5/09, gĭt nđờ tơlak nă kơnòm bơsram jơh gùt lơgar neh iăt tơngume sră pơyoa bơh Củ tịc lơgar dê pơyoa ai gah bơto bơtê in. Ală jơnau nting tơngkah, gùng dà pơlam ai gah bơto bơtê tàm nam bơsram pa bơh Củ tịc lơgar dê là bơta gơn kơ nờm pơnđơl pràn lơh ngan bơh gĭt nđờ tơlak nă kơnòm bơsram dê in.

Lài hơ̆, Thủ tướng Cíñ phủ ồng Phạm Minh Chính kung neh tus còp, pơndờm pơnđiang kơnòm bơsram, cau pơgru tàm bàr pe tiah. Tàm càr Phú Thọ, Thủ tướng sồr, nam bơsram pa ƀañ lời kơnòm bơsram ờ tơl sră giáo khoa, sơlơ bơto bơtê nùs nhơm, bơta chài kis ai ală kơnòm in. Thủ tướng Cíñ phủ ồng Phạm Minh Chính sồr ală hìu bơsram lơh pa broă lơh bơto bơtê mờ bơsram nàng geh bơta bal, mơkung geh bơta is, bơto ai kơnòm bơsram in ală bơta kwơ niam chài rơngơi, bơhiàn niam bơnĕ jơi bơtiàn dê. Tơnguh uă bơta niam să jan mờ bơta niam chài rơgơi, ală broă lơh dong kờl mpồl bơtiàn tàm hìu bơsram. Ƀañ lời kơnòm bơsram hìu bơnhă kal ke, kơnòm bơsram là làng bol kòn cau dùl ết nă cau gơtìp ờ geh lòt bơsram. Mờ ală tiah kung pal gàr niam tơl làm sră giáo khoa ai kơnòm bơsram in...

Cau mblàng K’Hạnh