Klo yal ồng Nguyễn Phú Trọng, Tổng Ƀí thư Mpồl duh broă Đảng Kộng sản dà lơgar Việt Nam sang rài, Mpồl duh broă Đảng làng bol kac màng dà lơgar Lào, Quôk hội lơgar Lào, Củ tịc lơgar Lào, Cíñ phủ lơgar Lào, Anih duh broă Mặt trận dà lơgar Lào bơt bơtàu dà lơgar mờ Làng bol lơgar Lào; Mpồl duh broă Đảng Kộng sản dà lơgar Lo mờ làng bol lơgar Lo; Củ tịc Đảng Làng bol Campuchia ồng Hun Sen, Thủ tướng lơgar Campuchia ồng Hun Manet, Củ tịc Quôk hội lơgar Campuchia ồng Khuon Sodary; Đại tướng Raúl Castro Ruz, Ƀí thư dơ̆ dùl Mpồl duh broă Đảng kộng sản dà lơgar Cuba, Củ tịc lơgar Cuba ồng Miguel Diaz Canel Bermúdez; Kwang atbồ lơgar Nga ồng Vladimir Putin, Củ tịc Thượng viện Nga mò Valentina Matvienko, Củ tịc Hạ viện Nga ồng Vyacheslav Volodin neh pơyua ală jơnau, ală sră tam pà moat jrùm tus Mpồl duh broă Đảng Kộng sản dà lơgar Việt Nam, Quôk hội lơgar Kộng hòa xã hội củ nghĩa Việt Nam, Củ tịc lơgar Kộng hòa xã hội củ nghĩa Việt Nam, Cíñ phủ lơgar Kộng hòa xã hội củ nghĩa Việt Nam, Anih duh broă Mặt trận dà lơgar Việt Nam mờ Làng bol Việt Nam. Tơngume ală jơnau pơyua, sră pơyua ai lơh pơlai soh uă ngan tŭ klo yal ồng Nguyễn Phú Trọng, Tổng Ƀí thư Mpồl duh broă Đảng kộng sản dà lơgar Việt Nam neh sang rài tàm ngai 19 nhai 7 nam 2024.

Ală jơnau pơyua, sră pơyua tam pà moat jrùm đơs nền: Ồng Nguyễn Phú Trọng sang rài, Đảng, Dà lơgar mờ Làng bol Việt Nam roh dùl nă kwang đơng lam bồ kac màng kơ̆ dơn. Tàm jơh rài kis lơh broă kac màng he dê, ồng Nguyễn Phú Trọng neh tă pơgồp jơh bơta pràn, bồ tơngoh, nùs nhơm he dê ai ală broă lơh kuơmàng tàm broă lơh tơngklàs jơi bơtiàn, tơrgùm dùl dà lơgar mờ broă lơh tam gơl pa bơh Đảng Kộng sản Việt Nam dê, ngan là tàm broă lơh bơt bơtàu, lơh niam wơl Đảng kơ̆ kơljap, pràn kơldang, sàng goh, kung bè broă lơh rơcang lài kơryan sa kuề sa kuà, broă ờ niam, ai dà lơgar Việt Nam ngai sơlơ bơtàu tơnguh, gơnoar broă bơh lơgar Việt Nam dê geh tơnguh loh làng ngan tàm muh mat dunia mờ tàm kơnhoàl ù tiah ală lơgar rềp bal. Ồng Nguyễn Phú Trọng neh gơ gơs là kwang đơng lam bồ jak chài ngan bơh tŭ tơngai dê.