Mpồl làng bol ƀòn 8, sơnah ƀòn Tân Tiến, ƀòn dờng Buôn Ma Thuột, càr Dăk Lăk geh 62 nă đảng viên. Mò Vũ Thị Huê, Bí thư Ci ƀộ pà gĭt, bơh nam 2019 tus tŭ do, pah nam ci ƀộ tơmŭt bơh 2 tus 3 nă đảng viên. Is ồn gùl nam do, neh tơmŭt 3 nă đảng viên. Ală đảng viên pa ndrờm geh bơsram bơh kâp bàr rlau hơđang, geh nùs nhơm bồ tơngoh kơ̆ dơn, sơnam kơnòm ngan. 05 nam tơn, ci ƀộ geh Đảng ƀộ sơnah ƀòn Tân Tiến săp khà ci ƀộ lơh gơs jak ngan kơnòl broă. Mò Vũ Thị Huê, đơs: Bol hi jàu broă ai 7 mpồl cau tàm mpồl ƀòn in, tơl mpồl pal tơmŭt yal tơnggĭt dồ nă làng bol jak ngan nàng tơmŭt tàm Đảng. Ală ơruh pơnu tàm mpồl, cau dồ nă să pơnđơl den mpồl bol hi sền swì. Sền niam gŏ niam bè ală bơta den sồr lòt bơsram ơdŭ gĭt wă bè Đảng mờ tơnơ̆ hơ̆ tơmŭt.

Bi Phan Thành Tiến là đảng viên kơnòm să pa geh tơmŭt đảng tàm ci ƀộ mpồl ƀòn 8 tàm nhai 05 nam 2024 pa do. Bi Tiến yal, bơh tŭ gam là cau bơsram dờng neh bơsram bè bơta boh lam Đảng dê mờ pơnđơl geh ơm tàm mpồl Đảng dê. Tơnơ̆ tŭ lik klờng đại họk rê lơh broă tàm sơnah ƀòn Tân Tiến, bi pơn jăt tai pơnđơl, tàp bơsram, sùm lơh sir tơl kơnòl broă geh jàu, jơh nùs tus bal lơh ală broă lơh srơh bơh tiah he dê. Ngai 08/05 pa do, bi chờ hờp là dùl tàm 2 nă làng bol kơnòm să jak ngan geh ơm tàm mpồl Đảng dê. Bi Tiến, đơs: Ală tŭ lơh broă tàm anih lơh broă, añ kung sùm lơh jăt tơngume jơnau sồr jơnau pal jăt mờ lơh ngan sùm pơnđơl tàm broă. Bơh hơ̆, kwang đơng lam bồ anih lơh broă ai tơl bơta lòt bơsram ơdŭ gĭt wă bè Đảng, mờ tus nhai 05 nam 2024 añ chờ hờp geh tơmŭt tàm mpồl Đảng dê.

Đảng ƀộ sơnah ƀòn Tân Tiến, ƀòn dờng Buôn Ma Thuột tŭ do geh 587 nă đảng viên, pơrjum tàm 20 ci ƀộ đảng kâp hơđơm, tàm hơ̆ 13 ci ƀộ mpồl ƀòn, 4 ci ƀộ hìu bơsram mờ ală ci ƀộ kwang àng, ling klàng, gah lơh sơnơm. Ală nam do, Đảng ƀộ sơnah ƀòn sùm lơh gơs niam broă lơh tơmŭt đảng ai cau kơnòm să in mờ geh Đảng ƀộ ƀòn dờng Buôn Ma Thuột đơs là Đảng ƀộ pràn kơldang kơ̆ kơl jăp tơl làm.

Jăt ồng Nguyễn Đình Ninh, Ƀí thư Đảng ủy sơnah ƀòn Tân Tiến đơs, gĭt nền loh làng tơmŭt đảng ai cau kơnòm să in là kơnòl broă kwơmàng, Đảng ủy sơnah ƀòn neh jàu kơnòl ai tơl ci ủy tàm broă lơh do. Ală ci ủy pal geh broă rơndăp lơh loh làng, nền cê tàm broă săc rwah, tề lam làng bol jak ngan. Ală ci ƀộ ndrờm lơh sir niam broă rơndăp lơh jàu, geh tŭ uă ci ƀộ sơrlèt broă jàu. Ồng Nguyễn Đình Ninh yal bè ală mờng chài rơcăng mpồl cau, tề lam mờ tơmŭt đảng ai cau kơnòm să in tàm Đảng ƀộ sơnah ƀòn Tân Tiến tàm tơngai tŭ do bè do: Ală làng bol mờ lòt bơsram lik klờng rê hờ ƀòn ờ hềt dan geh broă lơh, bol hi rơ̆p tơmŭt tàm mpồl ling klàng làng bol sền gàr is halà mŭt tàm ơruh pơnu nàng jăt sền, dong kờl, nàng khi in jơh nùs tus bal ală srơh ai ƀòn lơgar in. Bơh hơ̆, bol hi rơ̆p săc rwah làng bol jak ngan, cau tàm mpồl ơruh pơnu jak ngan nàng geh cau tơmŭt đảng.

Bơta geh ngan pà gŏ, broă lơh tơmŭt Đảng tàm sơnah ƀòn Tân Tiến, ƀòn dờng Buôn Ma Thuột neh geh lơh dồ ròt bal mờ geh cồng nha. Bơh hơ̆, lơh jăt niam gơnoar broă tờm bơh ci ƀộ đảng tàm kâp hơđơm dê, pơgồp bơnah bơtàu tơngguh lơh sa- mpồl bơtiàn mờ bơ̆t bơtàu Đảng ƀộ sơnah ƀòn Tân Tiến ngai sơlơ pràn kơldang kơ̆ kơl jăp tơl làm.