VOV4.K’ho- Ngai 26/01, dùl ròt ală mpồl lơh sa kă bro nhơl chờ, lam lòt nhơl neh cih “sră đơs bè bơta kơ̆p kờñ ngan” pơyua tus Thủ tướng in Yal tơn tàm Nhai 02 tus “Tơngai pờ mpồng Nhơl chờ dunia tàm Việt Nam”. Jăt ală mpồl lơh sa kă bro nhơl chờ đơs, tŭ do, Việt Nam gam lơh tơrlòng lài lơh jăt wă rò năc lòt nhơl bơh dunia mŭt tàm 7 tiah (5 tiah tơngai dơ̆ dùl mờ bơtơl tai 2 tiah tàm tơngai dơ̆ 2).

Mơya, tơnơ̆ 2 nhai lơh tơrlòng lài bal mờ ală jơnau pal geh, ală jơnau sồr nền nòn ngan ai năc lòt nhơl mờ ală mpồl lơh sa kă bro nhơl chờ, gah rơndeh par tus bal lơh broă do, tus tŭ do, Việt Nam rơ̆p mìng pa wă rò geh pơgăp 8 rbô 500 nă năc lòt nhơl. Den tàng bè hơ̆, ală mpồl lơh sa kă bro đơs, pal geh bơta tam gơl mhar bè jơnau sồr, gùng dà broă lơh gơwèt mờ ală broă lơh do nàng gơdờp dipal mờ tŭ tơngai pa. Kơrnoăt pờ mpồng nhơl chờ dunia bơh Cíñ phủ, Thủ tướng Cíñ phủ dê ngan là tŭ tơngai niam nàng “dong kờl kis gơs” ală mpồl lơh sa kă bro, “dong kờl kis gơs” 2 tơlak 500 rbô nă cau lơh broă tơn tàm gah do mờ gĭt nđờ tơlăk nă cau lơh broă ờ ngan ngồn ndai tai.

Cau mblàng Lơ Mu K’Yến