VOV4.K’ho- Drim ngai 29/6, Tổng kụk Thống kê (Ƀộ Kế hoạc mờ Đầu tư) bơyai lơh pơrjum ƀău yal khà kờp lơh sa- mpồl bơtiàn quý 2 mờ 6 nhai bồ nam 2022. Jat jơnau yal, 6 nhai bồ nam, GDP gơguh 6,42%- jơnhua rlau khà gơguh nam 2020- 2021 dê mơya kung ờ hềt gơ rê wơl khà gơguh nam 2019 dê; gùt lơgar geh 76 rbô 200 mpồl lơh sa kă bro cih mat crơng gơs pa, gơguh 13,6%; 602 rbô dơ̆ nac dunia neh tus mờ Việt Nam- gơguh uă rlau 6,8 dơ̆ pơndrờm mờ bal dùl tŭ nam lài; khà priă bơcri tơn lơgar ndai FDI geh khà gơguh uă ngan rlau jơh bal dùl tŭ 5 nam do... Do là ală tềl tơnggŏ niam bơh bơta bơtàu tơnguh lơh sa 6 nhai bồ nam dê. Tổng kụk thống kê đơs nền, lơh sa Việt Nam geh bơta pràn bơtàu tơnguh dờng rlau tàm ală nhai gam wơl bơh nam dê, jơnau kờñ ngui sa phan bơna mờ broă drơng ala gơguh geh tơnguh khà priă phan bơna gơguh jơnhua.

Cau mblàng K’Duẩn