VOV4.K’ho- Tơnơ̆ tŭ kòp Kovid-19 geh kơryan, lơh sa- mpồl bơtiàn tàm tiah Tây Nguyên neh geh ală tềl tơngŏ bơtàu tơnguh wơl. Tàm hơ̆, broă lơh gơhòi gơ jà bơcri priă lơh geh cồng nha niam ngan, tă kes priă tàm ală tiah ndrờm geh khà gơguh uă, broă lơh sền gàr lơngăp lơngai rài kis mpồl bơtiàn geh lơh niam.

Jăt jơnau yal bơh Ủy ƀan Ñân zân càr Gia Lai, lơh sa- mpồl bơtiàn tàm càr 9 nhai nam 2022 geh uă tềl tơngŏ bơtàu tơnguh wơl pràn. Tàm hơ̆, khà mpồl lơh sa kă bro lơh pa mờ cồng nha gơhòi gơ jà bơcri priă ndrờm lơh geh cồng nha niam ngan. Mùl màl, bơh bồ nam tus tŭ do, tàm càr Gia Lai geh rlau 740 mpồl lơh sa kă bro geh lơh pa (gơguh mờr 17% pơndrờm bal dùl tŭ mờ nam 2021), mờ kờp jơh priă bơcri cih tàm sră là rlau 7 rbô 400 tơmàn đong. Bè gơhòi gơ jà bơcri priă, Ủy ƀan Ñân zân càr Gia Lai kĭ gùng dà bơcri priă ai 6 rơndăp broă lơh in, mờ kờp jơh priă bơcri rlau 600 tơmàn đong. 15 rơndăp broă lơh ndai, kờp jơh priă bơcri rlau 3 rbô 400 tơmàn đong neh lơh sir jơh sră pơ àr, gam geh càr sền swì. Jăt ồng Nguyễn Hữu Quế, Kwang ătbồ Sở Kế hoạc mờ Đầu tư càr Gia Lai, nàng tiah bơcri priă song dơ pă loh làng, ring bal rlau, càr lơh pràn lơh niam wơl sră pơ àr dà lơgar mơkung kràñ cê kơ̆ nùs ai wơl rơndăp broă lơh lơh ờ di jơnau hơ. Ồng Nguyễn Hữu Quế, đơs: Tàm 9 nhai bồ nam neh tơn jơh lơh broă bơh 4 rơndăp broă lơh dê. Gam wơl, bàr pe rơndăp broă lơh gam pơn jăt tai jà tus lơh broă nàng lơh sir gơs sră pơ àr tơn jơh bơcri priă. Gam 30 rơndăp broă lơh bulah lơyài tơngai lơh mơya gam tàm bơta ai gơnoar bơh Adat Bơcri priă dê den tàng bol añ pơn jăt tai jăt sền, dilah rlau ir tơngai ai den geh tơn jơh bơcri priă. Sở Kế hoạc mờ Đầu tư neh dan jơnau đơs Ủy ƀan Ñân zân càr dê ai lơh jăt kơrnoăt tam gơl Kơrnoăt 3232 nam 2020, nàng ƀươn ƀoài rlau tàm ală tŭ lam lơh ală rơndăp broă lơh bơcri priă.

Gia Lai hòi jà bơcri priă tàm Tiah sền gàr chi che brê bơnơm geh is Kon Hà Nừng

Kung nàng kờñ sơlơ gơhòi gơ jà bơcri priă, pa do, càr Gia Lai ai lơh jăt mat rơndăp broă lơh hòi jà bơcri priă tơngai bơh nam 2022- 2025, mờ kờp jơh 35 rơndăp broă lơh mờ kờp priă bơcri là rlau 8 rbô 300 tơmàn đong gơwèt ală gah broă lơh bơ̆t bơtàu phan bơna; măy mok lơh gơlik phan bơh lơh broă sa sươn sre- dơm chi mờ lơh gơlik phan ngui bơ̆t bơtàu, phan ngui sa; lơh broă sa sươn sre, broă brê bơnơm; bơto bơtê, niam chài, tàp pràn să jan mờ nhơl chờ.

Tàm càr Dăk Lăk, 9 nhai nam 2022, gah Dia càr Dăk Lăk neh tă dia sơrlèt broă jàu tàm broă rơndăp lơh rlau 24% pơndrờm bal dùl tŭ mờ nam lài, sơrlèt uă rlau broă jàu broă rơndăp lơh. Mùl màl, tàm 9 nhai nam 2022, Kụk Dia càr Dăk Lăk neh tă geh rlau 4 rbô 520 tơmàn đong, gơguh mờr 1 rbô tơmàn đong pơndrờm bal dùl tŭ mờ nam lài. Cồng nha lơh geh hơ̆ là tài bơh tơnơ̆ kòp Kovid-19 geh gròi sền, ală mpồl lơh sa kă bro mŭt tàm kơ̆ kơl jăp lơh broă lơh sa kă bro gơ hoài jăt bal ală priă tă gơguh mhar. Khà gơguh gơ ơm tàm ală mpồl lơh sa kă bro tờm, bè: Ƀièr, dà lơngồt, năng lượng lơh geh wơl đèng càl, đèng măt tơngai, tăc mờ lơgar ndai phan lơh geh bơh sươn sre, priă lơh geh is să tờm dê...Ồng Bùi Văn Chuẩn, Kwang ătbồ Kụk Dia càr Dăk Lăk pà gĭt, broă jàu tă dia nam do là 4 rbô 700 tơmàn đong neh tă lơh geh broă rơndăp lơh. Jơnau kờñ pa sồr lơh ai 3 nhai gam wơl in là sơrlèt pơgăp 700 tơmàn đong. Ồng Bùi Văn Chuẩn, đơs: Bol añ pơn jăt tai tơnguh tai ală broă lơh dong kờl mpồl lơh sa kă bro lơh jăt ală broă dong kờl ờ tă, tơrmù tă, tơn jŏ tơngai tă, dong ală mpồl lơh sa kă bro pơn jăt tai bơtàu tơnguh wơl nàng gơguh lơh sa geh priă tơm priă dia. Dơ̆ bàr là pơn jăt tai lam lơh ătbồ dia điện tử. Bơdìh hơ̆ tai, bol añ kung gah pơn jăt tai jòi tă ală priă dia pa geh, lam lơh ală broă lơh tă, kơryan hoàc hươr tă, cih mat ală mpồl tă geh tă uă aniai nàng bơsong di tŭ. Mờ dŭt ndơl là bol añ geh kung gam geh lơh sùm broă lơh ală Mpồl sồr kơryan hoàc hươr tă dia càr, ală kơnhoàl, thị xã mờ ƀòn dờng dê nàng kờñ tă tơl broă jàu bơh Dà lơgar mờ càr dê jàu.

Dăk Lăk tam tìp ală cau dong kờl lơgar ndai

Bal mờ broă lơh pràn lơh sa- kă bro, bơtàu tơnguh lơh sa, ală càr tàm tiah Tây Nguyên kung sền gròi tus broă lơh sền gàr lơngăp lơngai rài kis mpồl bơtiàn. Pa do, Ủy ƀan Ñân zân càr Dăk Lăk neh bơyai lơh pơrjum tam tìp ală cau dong kờl lơgar ndai. Đơs tàm dơ̆ pơrjum, ồng Võ Văn Cảnh, Phó Củ tịc Ủy ƀan Ñân zân càr Dăk Lăk đơs nền, càr sùm rơcăng ai tơl ală bơta niam ngan rlau jơh nàng ală mpồl, ală cau dong kờl lơgar ndai in lơh broă bal, dong kờl càr tàm tơngai tus. Ồng Võ Văn Cảnh đơs tai: Ủy ƀan Ñân zân càr kung bè ală sở, ƀan, ngàñ bơh càr Dăk Lăk dê geh sồr ală cau tờm rơndăp broă lơh pơgồp bal niam rlau tai mờ ală cau lơh broă bal, lơh pràn lơh niam wơl sră pơ àr dà lơgar nàng ală broă lơh, rơndăp broă lơh geh lơh mhar rlau, cồng nha rlau mờ geh kwơ ngan rlau. Den tàng bè hơ̆, añ kơ̆p kờñ là ală mpồl neh mờ gam lơh broă bal mờ Dăk Lăk sền càr là dùl nă cau lơh broă bal jơh nùs mờ dipal ngan pin dờn, tơnguh rlau tai ală broă lơh, rơndăp broă lơh, pơgồp bơnah uă ngan tàm bơta bơtàu tơnguh ală bơta lơh sa- mpồl bơtiàn càr dê.

Jăt jơnau yal, 2 nam do, càr Dăk Lăk neh hòi jà tă pơgồp rlau 6 tơlak 500 rbô dolar Mỹ jăt broă lơh sơlơ lơh broă bal mờ hòi jà dong kờl ờ gơwèt Cíñ phủ. Tàm hơ̆, kờp tus nhai 8 nam do, Ủy ƀan Ñân zân càr neh kĭ dờp 51 bơnah priă dong kờl bal mờ kờp jơh priă hòi jà geh mờr 3 tơlak 700 rbô dolar Mỹ. Tŭ do, gam 7 bơnah dong kờl mờ kờp jơh priă hơ geh mờr 2 tơlak 900 rbô dolar Mỹ neh geh yal dong kờl. Ală ù tiah dong kờl uă ngan tơrgùm tàm ală xã tiah sar lơgar ngài, tiah kal ke ir tàm ală kơnhoàl geh khà hìu rƀah uă ngan rlau jơh, bè: Lăk, Krông Bông, M’drak, Buôn Đôn, Ea Súp. Gah broă dong kờl mìng là gah lơh sơnơm, bơto bơtê, chi che brê bơnơm tiah ơm kis, bơtàu tơnguh lơh sa- mpồl bơtiàn mờ bơsong ală broă mpồl bơtiàn.

            Cau cih VOV Tây Nguyên- Cau mblàng Lơ Mu K’Yến