VOV4.K’ho- Drim ngai 08/06, Ƀộ Giáo zụk mờ Đào tạo bơyai lơh pơrjum pờ tơn tàm internet bè broă lơh bơyai lơh pơrlòng jơh bơsram kâp pe nam 2022. Tus bal pơrjum geh Mpồl đơng lam pơrlòng bơh 63 càr mờ ƀòn dờng dê mờ cau ala mat bơh ală Ƀộ, Anih lơh broă gơrềng bal. Dơ̆ pơrlòng jơh bơsram kâp pe nam do geh lơh tàm ală ngai 7 mờ 8/07 tus. Tus tơngai do, Ƀộ Giáo zụk mờ Đào tạo neh ai lơh jăt tơl ală sră nggal sồr lơh, bơto pơlam bè bơyai lơh dơ̆ pơrlòng jơh bơsram kâp pe nam 2022.

Jơh gùt anih bơyai lơh pơrjum bè broă lơh bơyai lơh pơrlòng jơh bơsram kâp pe nam 2022

Kờp tus 5 jiơ mho ngai 05/06, ală anih neh lơh sir jơh broă kĭ Sră cih mat dan pơrlòng mờ kờp jơh rlau 1 tơlak 2 rbô nă cau pơrlòng cih mat dan pơrlòng. Yal tàm pơrjum, ală tiah pà gĭt, neh tơn jơh broă lơh nam bơsram ai kơnòm bơsram ơdŭ 12 in jăt broă rơndăp lơh mờ tŭ do gam lơh broă bơyai lơh sền wơl ală jơnau neh bơsram. Ală tiah ndrờm lơh Mpồl đơng lam pơrlòng kâp càr, kâp kơnhoàl nàng bơyai lơh dơ̆ pơrlòng dùl bă niam ngan rlau jơh. Ală broă rơcăng lài bè phan bơna, cau lơh broă ai dơ̆ pơrlòng in gam geh lam lơh, gơtùi bơyai lơh bal dùl dơ̆ pơrlòng tàm làm gùt lơgar jăt broă rơndăp lơh neh ai tơlik.

Cau mblàng Lơ Mu K’Yến