Tơngai bơh nam 2018 tus 2024, tàm Tây Nguyên neh geh uă broă tơrlòng lơh jơh gùt làng bol sền gàr lơngăp lơngai Dà lơgar, là tiah niam jăt broă lơh atbồ is, rơcang gàr is, sền gàr is, geh nùs nhơm mpồl bơtiàn tus bal uă, geh mpồl bơtiàn cau làng bol jơi bơtiàn ờ gal cau kờñ bal, tus bal uă. Tàm hơ̆ geh pơnrơ ngan là ală broă tơrlòng lơh “Rê wơl mờ nùs nhơm pin dờn, gàr bơta lơngăp lơngai ƀòn lơgar”, “Broă atbồ bơto bơtê cau FULRO tàm mpồl bơtiàn” tàm càr Gia Lai dê; broă lơh “Hìu yàng bàp lơngăp lơngai – gàr niam lơngăp lơngai”, “Mpồl atbồ is bè lơngăp lơngai mờ bơto bơtê ơruh pơnu tìs adăt boh lam” tàm càr Kon Tum; broă lơh “Tiah ƀòn ơm kis lơngăp lơngai ờ geh cau tìs”, “3 ờ do ờ dă lơngăp lơngai Mpồl jăt yàng Tin lành Ea Sol” tàm càr Dăk Lăk; broă lơh “5+1 atbồ, bơto bơtê, dong kờl cau neh jơh lơh jăt broă lơh glài jàm rê kis tơrgùm bal wơl mpồl bơtiàn”, “Hìu yàng bàp Nhân Cơ lơngăp lơngai” tàm càr Dăk Nông; broă lơh “Mpồl ƀòn atbồ bè lơngăp lơngai”, “Cau jăt yàng bàp tiah làng bol jơi bơtiàn ờ gal cau tàm thôn 4, xã Tân Châu pơgồp bal mờ broă gàr niam lơngăp lơngai” càr Lâm Đồng dê…

Bơh broă lơh neh geh uă cau lam lài geh pơnrơ jăk, lam lài lơh jăt niam gùng dà broă lơh bơh Đảng, adăt boh lam bơh Dà lơgar dê, jơnau pal jăt bơh ƀòn lơgar dê. Geh uă ngan cau dùl nă să tus bal, dong kờl ală mpồl lơh broă tàm broă sền gàr bơta lơngăp lơngai, mblàng yal lam sồr làng bol rơcang lài tềng dăp mờ nùs nhơm ờ niam, broă lơh kờñ tam cah is nùs nhơm tam klăc bal jơi bơtiàn, rơcang tam dră mờ cau tìs, ờ niam mpồl bơtiàn, rơcang kơrian mờ crùh ồs sa, sền gàr gùng nhàr lơgar, ñjrong nhàr lơgar, sền gàr tiah kis…

Tàm pơrjum, Ƀộ Kwang àng neh jào pà sră jờng rơ ai 86 mpồl, cau dùl nă să geh pơnrơ jăk ala măt ală broă tơrlòng lơh, cau geh pơnrơ gơguh jăk tàm broă gùt làng bol sền gàr lơngăp lơngai Dà lơgar tiah làng bol jơi bơtiàn ờ gal cau tiah Tây Nguyên tơngai bơh nam 2018 tus 2024. Ồng Y Djan Êban, tàm xã Ea Ktur, kơnhoàl Cư̆ Kuiñ, càr Dăk Lăk là dùl tàm ală cau geh jờng rơ tàm dơ̆ do pà git: “Añ pơn yờ să ngan geh Ƀộ Kwang àng jà tus bal tìp măt bè broă gùt làng bol tus bal sền gàr lơngăp lơngai Dà lơgar. Añ pơn yờ să ngan. Tơnơ̆ mờ pơrjum do, añ pơn jăt tai rê tàm ƀòn tus bal mờ oh mi ƀòn lơgar bơtàu tơnguh rơlao tai geh bal lơh sa, niam chài, mpồl bơtiàn, sền gàr dà lơgar lơngăp lơngai kung bè lơh sa gơguh rơlao gơwèt mờ ƀòn lơgar dê”.

Bal mờ pơrjum bal gùt tiah dê, mìng is tàm càr Dăk Lăk, Ƀộ Kwang àng kung neh bơyai lơh Ngai chờ Gùt làng bol sền gàr lơngăp lơngai Dà lơgar tàm tiah làng bol jơi bơtiàn ờ gal cau nam 2024. Jăt jơnau yal, broă gùt làng bol sền gàr lơngăp lơngai Dà lơgar neh geh ală broă bơtàu tơnguh pràn kơl dang, geh lơh uă bơh càr tus tàm ală xã. Uă broă tơrlòng lơh atbồ is bè lơngăp lơngai, ală mpồl rơcang kơrian, tam dră mờ cau tìs lơh geh cồng nha. Đơs tàm ngai chờ, Trung tướng ồng Lê Quốc Hùng, Thứ trưởng Ƀộ Kwang àng đơs nền: Càr Dăk Lăk là tiah tàm gùl Tây Nguyên dê, geh ù tiah kwơ màng bè lơngăp lơngai, cíñ trị, lơh sa, niam chài – mpồl bơtiàn. Den tàng broă gàr niam lơngăp lơngai, ai geh tiah lơngăp lơngai, niam nàng drơng broă bơtàu tơnguh lơh sa mpồl bơtiàn là kơnòl kwơ màng ngan gơwèt mờ jơh gùt mpồl lơh broă cíñ trị.

Trung tướng ồng Lê Quốc Hùng sồr, càr Dăk Lăk pơn jăt tai lơh pràn broă gùt làng bol sền gàr lơngăp lơngai Dà lơgar, pơgồp bal tàm broă brồ guh mờ ngui gơnoar, bơta pràn dờng màng bơh làng bol dê. Trung tướng ồng Lê Quốc Hùng pà git: “Pal sền gròi mờ tơnguh, bơ̆t bơtàu mpồl lơh broă cíñ trị tàm ală tiah pràn kơl dang tơl ală bơta. Tơl nă kwang bàng, đảng viên pal lơh jăt nền nòn, mùl màl wă nùs nhơm, jơnau kơ̆p kờñ bơh Làng bol dê, tài bơta kwơ bơh Làng bol; lơh krơh, lam lài tàm broă gùt làng bol sền gàr lơngăp lơngai Dà lơgar. Lơh pràn broă lam sồr làng bol pơgồp bal mờ mblàng yal, lam lơh, tơnguh uă jơnau git wă bơh làng bol. Tơrgùm lòt tus tàm ală tiah kwơ màng, tiah tờm, tiah làng bol jơi bơtiàn ờ gal cau, tam gơl pa ală broă mblàng yal nàng bơ̆t bơtàu srơh jơh gùt làng bol sền gàr lơngăp lơngai Dà lơgar”.

Tàm Ngai chờ, Ƀộ Kwang àng mờ Anih duh broă làng bol càr Dăk Lăk neh jào pà uă pò phan ai ală hìu nhă làng bol jơi bơtiàn ờ gal cau geh rài kis gơtìp kal ke tàm ƀòn dờng Buôn Ma Thuột. Di tàm dơ̆ do, dùl mpồl, 1 nă cau geh dờp Sră jờng rơ bơh Ƀộ Kwang àng; 1 mpồl, 3 nă cau dờp sră jờng rơ bơh Kwang atbồ Kwang àng càr Dăk Lăk tài neh geh cồng nha jăk ngan tàm srơh Jơh gùt làng bol sền gàr lơngăp lơngai Dà lơgar nam 2024.