Kra ƀòn ồng Rơ Chăm Tích là cau Jrai ơm tàm ƀòn Mook Đen 2, xã Ia Dom, kơnhoàl Đức Cơ, càr Gia Lai là dùl tàm ală đảng viên pơnrơ tàm broă pơgồp bal mờ ală kâp ủy Đảng, gơnoar ătbồ mờ ală mpồl cau nàng mblàng yal, hòi jà làng bol sền gàr gùng nhàr lơgar, jrong nhàr lơgar. Uă nam do, ồng kung gam jơh nùs ngan lòt tus tơl hìu mblàng yal, hòi jà làng bol tơnguh uă bơta gĭt wă, ờ gŏ di dô gan nhàr lơgar; sơrbì tĕ ală broă lơh sơgràm ù lơh mìr tàm ală kơnhoàl ù tiah nhàr lơgar; đòm jăt nùs nhơm tam klăc bal, sang tĕ bơhiàn bơngơl gơla, tàm pơrlòng lơh sa, lơh kau su, kơphê nàng lơh sa hìu bơnhă dê sơlơ bơtàu tơnguh rlau tai. Ồng Rơ Chăm Tích pà gĭt: Ia Dom là xã tiah nhàr lơgar kal ke ngan, cau jơi bơtiàn dùl êt nă cau ờ hềt gĭt wă uă bè adat boh lam. Sơmờm bơta do, ală mpồl pơrlơ̆ dră mờ dà lơgar sùm hoài jà, bơchồt làng bol dô gan nhàr lơgar tìs mờ adat boh lam, tam cah is mpồl tam klăc dờng jơi bơtiàn. Gơ wèt mờ ồng, sền gàr gùng nhàr lơgar jrong nhàr lơgar, gàr kơnhăp gơnoar tờm ù tiah lơngăp lơngai tiah nhàr lơgar Dà lơgar dê là broă lơh kwơmàng mờ dờng màng ngan. Ồng Rơ Chăm Tích, đơs: Bè lơngăp lơngai tàm do lơngăp lơngai ngan, bè broă lơh tiah nhàr lơgar là añ lòt tus hờ pôs đồng lơh broă bal mờ pôs đồng, là lòt sền lòt gak jrong nhàr lơgar tàm tiah nhàr lơgar. Nam lơi kung lòt lơm nàng mblàng yal ai làng bol in ờ gŏ di geh mŭt tus đah ne ờ; lơh mìr lơh sươn tàm ù đah he dê. Ngan là rơnàng kơnòm să bè broă bau gờñ añ kung mblàng yal uă bè gùng dà jơnau sồr bơh Đảng dê mờ gùng dà broă lơh, adat boh lam bơh Dà lơgar dê là kơryan ờ ai ì, rơnàng kơnòm să bau gờñ là ờ gŏ di.

Mò Lê Thị Khánh Hoà, Ƀí thư Đảng ủy xã Ia Dom, kơnhoàl Đức Cơ pà gĭt: Tàm ù tiah xã geh 4 nă kra ƀòn. Ală kra ƀòn sùm lam lài tàm ală srơh tàm ƀòn lơgar, pơgồp bơnah bơtàu tơnguh lơh sa- mpồl bơtiàn, sền gàr lơngăp lơngai cíñ trị mờ rơndăp tăp sèng lơngăp lơngai jơh gùt mpồl bơtiàn tàm ƀòn làng bol ơm kis. Kwơmàng, Ia Dom là xã tiah nhàr lơgar den tàng ală kra ƀòn, là đảng viên lơh krơh, sùm bal mờ ală anih lơh broă, ală gah lơh broă, mpồl ling sền gàr tiah nhàr lơgar mblàng yal, hòi jà làng bol tus bal sền gàr gùng nhàr lơgar, jrong nhàr lơgar, sền gàr tiah nhàr dà lơgar in. Mò Lê Thị Khánh Hoà, đơs: Gơ wèt mờ xã den ală kra ƀòn, kwang ƀòn, cau geh bơngă pin dờn tàm ƀòn lơgar lơh jăt niam gơnoar broă kơnòl broă. Bơh jơi nòi, hìu bơnhă, lơh krơh tàm tŭ lơh jăt broă ñô bau, ies tơ̆p ƀồc cau chơ̆t, lơh jăt rài kis bơtàu tơnguh jak chài, mblàng yal bè broă bau gờñ, hòi jà làng bol lòt bơsram, blơi ƀảo hiểm ai làng bol in den bơh hơ̆ khi iăt mờ lơh jăt.

Ndrờm bè hơ̆ sơl tàm kơnhoàl tiah nhàr lơgar Chư Prông, ală kra ƀòn, đảng viên kung lơh gơtùi gơnoar broă, bơngă pin dờn bơh he dê, hòi jà jơi nòi, ƀòn lơgar tus bal bơtàu tơnguh lơh sa- mpồl bơtiàn, bơ̆t bơtàu Đảng mờ ală anih lơh broă cíñ trị; sền gàr lơngăp lơngai rơndăp tăp sèng, bơ̆t bơtàu mpồl tam klăc dờng ală jơi bơtiàn. Ồng Rơ Lan H’Lêk là kra ƀòn Klah, xã Ia Mơ, kơnhoàl Chư Prông, pà gĭt: Ù tiah xã là xã tiah nhàr lơgar den tàng broă hòi jà làng bol mờ broă lơh mblàng yal kung kal ke ngan mơya să tờm añ lơh broă do sùm nàng kờñ gĭt broă gơlik geh tàm ƀòn. Să tờm añ den làng bol neh pồ añ lơh kra ƀòn den añ pơn jăt tai pơđơl pràn lơh ngan. Añ gam kis gam tă nhơm là añ pơn jăt tai drơng broă ai làng bol in nàng lơh bè lơi làng bol in gĭt wă loh geh broă dong kờl, adat boh lam bơh Đảng, Dà lơgar dê gơ wèt mờ tiah nhàr lơgar, tiah làng bol jơi bơtiàn dùl êt nă cau.

Jơh gùt càr Gia Lai tŭ do geh 955 nă kra ƀòn, cau geh bơngă pin dờn pơnrơ tàm tiah làng bol jơi bơtiàn dùl êt nă cau, tàm hơ̆ geh uă đảng viên. Tàm tơngai bơh nam 2021- 2023, ală cau geh bơnhă pin dờn pơnrơ tàm càr Gia Lai neh sùm jơh nùs pơgồp bal mờ ală ƀan gah lơh broă tàm ƀòn lơgar mblàng yal, hòi jà làng bol tus bal tă pơgồp, dong kờl jơh nùs srơh “Jơh gùt làng bol tam klăc bơ̆t bơtàu ƀòn lơgar pa, tiah drà bơtàu tơnguh” bal mờ rlau 700 tơmàn đong, pà rlau 132 rbô thơk vuông ù mờ tă pơgồp rlau 47 rbô ngai lơh broă. Bal mờ hơ̆, cau geh bơngă pin dờn dong kờl ai rlau 20 rbô hìu bơnhă rƀah là làng bol jơi bơtiàn dùl êt nă cai tam gơl bồ tơngoh kơlôi sơnơng, broă lơh tàm lơh broă, lơh sa, brồ guh lik klàs bơh rƀah, pơgồp bơnah tơrmù khà hìu rƀah tàm ù tiah càr dê.

Ồng Hồ Văn Niên, Kwang bàng Đảng Dà lơgar, Ƀí thư Tỉñ ủy càr Gia Lai, đơs: Lơh jăt gơnoar broă, kơnòl broă gơ wèt mờ mpồl bơtiàn, cau geh bơngă pin dờn tàm càr Gia Lai neh lơh jăt niam gơnoar broă bơh he dê tàm broă hòi jà mpồl bơtiàn lơh jăt kơnòl broă bơtàu tơnguh lơh sa- mpồl bơtiàn, tus bal sền gàr lơngăp lơngai rơndăp tăp sèng tàm ƀòn lơgar. Ồng Hồ Văn Niên, đơs: Gơnoar broă bơh cau geh bơngă pin dờn dê dong ai rài kis làng bol dê tàm ală thôn, ƀòn kung bè bơta lơngăp lơngai cíñ trị, rơndăp tăp sèng lơngăp lơngai mpồl bơtiàn tàm ală ƀòn lơgar thôn ƀòn geh gàr kơ̆ mờ lơh niam. Gàr geh bơhiàn niam chài krơi is bơh tơl làng bol jơi bơtiàn dùl êt nă cau dê, den tàng kâp ủy gơnoar ătbồ ƀòn lơgar bơh kơnhoàl mờ bơh càr dê bol añ ki ngàm ngan gơ wèt mờ gơnoar broă bơh cau kra ƀòn mờ là cau geh bơngă pin dờn dê.