Trồ pa mang, ală ƀong đềng ngui năng lượng mat tơngai bơh broă lơh Sòl àng gùng tiah nhàr lơgar tàm xã tiah nhàr lơgar Krông Na, kơnhoàl Buôn Đôn, gơ àng is.  Đại úy ồng Y Hán Hwing- Kwang atbồ mpồl Hòi jà làng bol, Pôs đồng ling sền gàr tiah nhàr lơgar Srepok, Mpồl ling sền gàr tiah nhàr lơgar càr Dăk Lăk, đơs, geh ƀong đèng sòl àng cơnđòa jơng lòt sền ală bi sơlơ kơ̆ kơl jăp rlau tai tàm tŭ lơh jat kơnòl broă.

Đại úy ồng Y Hán Hwing, đơs:"Bơh tŭ geh broă lơh Sòl àng gùng tiah nhàr lơgar geh crăp tàm gùng lòt sền tiah nhàr lơgar den ƀuơn ngan ai ală kwang bàng, cau ling tàm mpồl ling in tàm tŭ lòt sền, gàr geh bơta lơngap lơngai. Dơ̆ 2, là dong kờl sền gŏ di tŭ ală cau geh ală tềl tơngŏ lơh aniai gùng tiah nhàr lơgar, bơh hơ̆ ƀuơn ngan tàm broă atbồ, sền gàr tiah nhàr lơgar bơh mpồl ling dê”.

Broă lơh Sòl àng gùng tiah nhàr lơgar tàm gơl gùng tiah nhàr lơgar bơh Pôs đồng ling sền gàr tiah nhàr lơgar Srepok dê atbồ geh bơta jòng pơgap 3 kơi sồ, tàm hơ̆ geh 20 nơm bong đèng năng lượng mat tơngai, crăp tàm tiah jrong sền gàr tiah nhàr lơgar sồ 45 (2), bàr pe nơm jrong ing mờ ală gơl gùng lòt sền bơh Pôs đồng ling sền gàr tiah nhàr lơgar dê. Broă lơh do bơh Tỉñ đoàn càr Dăk Lăk mờ ală mpồl lơh broă dong kờl lơh tàm nhai 03 nam do, di dơ̆ tơngkah kir sơnrai 93 nam Ngai bơhiàn yau Mpồl ling sền gàr tiah nhàr lơgar dê.

Bi H’ Giang Niê, Ƀí thư Tỉñ đoàn càr Dăk Lăk pà gĭt, Pôs đồng ling sền gàr tiah nhàr lơgar Srepok là mpồl ling dơ̆ 2 tàm càr geh lam lơh broă lơh Sòl àng gùng tiah nhàr lơgar tàm nam do. Do kung là dùl tàm 2 broă lơh tờm bơh rơnàng kơnòm să càr Dăk Lăk dê lam lơh tàm nam do nàng kờñ tàm pơrlòng lơh geh cồng nha gờm chờ 120 nam Ngai tơlik mat càr Dăk Lăk dê.

Bi H’ Giang Niê, đơs:"Nam do, den bol añ jơh nùs lơh ngan lơh 27 kơi sồ Sòl àng gùng tiah nhàr lơgar. Tus tơngai tŭ do den bol añ hòi jà tă pơgồp bal bơh ală priă jền tàm càr mờ bơdìh càr, chờ hờp ngan tài geh bơta tus bal, lơh jat bal bơh ală đoàn viên, ơruh pơnu mờ bơta lòt bal, dong kờl bơh ală mpồl lơh sa kă bro, ală càr bơyô bal nàng bol añ in lơh gơs ngan ngồn jơnau sồr bơh he dê. Do là dùl broă lơh nàng lòt bal mờ ală cau ling tiah nhàr lơgar, tơl jrong crăp ƀong đèng rơ̆p là dùl jrong kis đơs nền gơnoar tờm tiah nhàr lơgar bơh lơgar Việt Nam dê”.

Thượng tá Rơ Lan Ngân, Phó Cíñ ủy Mpồl ling sền gàr tiah nhàr lơgar đơs: ală broă lơh Sòl àng gùng tiah nhàr lơgar ờ mìng tơngŏ bơta sền gròi bơh mpồl Đoàn dê gơwèt mờ mpồl ling sền gàr tiah nhàr lơgar lơm mờ gam pơgồp bơnah bơto bơtê bơhiàn kăc màng, gơnoar tờm tiah nhàr lơgar ai đoàn viên, ơruh pơnu in. Mờ tơl broă lơh geh dờp, ală mpồl ling rơ̆p lòt sền sùm, lơh niam wơl nàng ngui geh cồng nha mờ jŏ jòng.

Thượng tá Rơ Lan Ngân, đơs: "Bol añ chờ hờp ngan geh bơta sền gròi bơh kwang đơng lam bồ ală kấp dê. Tàm hơ̆ Tỉñ đoàn càr Dăk Lăk mờ Tỉñ đoàn Bình Dương neh dong kờl ai bol añ in ală ƀong đèng Sòl àng gùng tiah nhàr lơgar. Bol añ rơ̆p ngui ală ƀong đèng do di mờ jơnau kờñ mờ gàr niam, sền gàr lơngăp lơngai tàm tŭ lam lơh jat mờ pơgồp bơnah lơh jat geh cồng nha kơnòl broă cíñ trị bơh anih lơh broă, mpồl lơh broă geh jàu ai Mpồl ling sền gàr tiah nhàr lơgar càr dê, lơh jat kơnòl broă tàm tơngai tus”.

Càr Dăk Lăk geh pơgap 73 kơi sồ gùng tiah nhàr lơgar, rềp nhàr lơgar bal mờ càr Mondulkiri, lơgar Campuchia. Mờ broă lơh Sòl àng gùng tiah nhàr lơgar tàm gơl gùng tiah nhàr lơgar bơh rơnàng kơnòm să càr Dăk Lăk dê lơh tàm nam do, kờp dŭ rơ̆p sòl àng tàm ală jrong sền gàr tiah nhàr lơgar bơh Mpồl ling sền gàr tiah nhàr lơgar càr Dăk Lăk dê atbồ, sền gàr. Mờ tơl jrong đèng geh sòl àng, ờ mìng lơh geh bơta ƀuơn ngan ai kwang bàng, cau ling sền gàr tiah nhàr lơgar in tàm gùng lòt sền, sền gàr lơngăp lơngai tiah nhàr lơgar lơm mờ gam sòl geh bơta àng gơnoar tờm tàm tơl kơnhoàl ù tiah dờng màng tiah nhàr lơgar bơh Dà lơgar dê.