Drim ngai 23/9, tàm Hìu lơh broă Quôk hội, Anih duh broă lơh kơnòl broă sùm Quôk hội mut tàm dơ̆ 2 bơh pơrjum dơ̆ 37 dê. Tàm drim do, Anih duh broă Lơh kơnòl broă sùm Quôk hội ai jơnau đơs tàm rơndap lơh Adat dia tac phan krơi is. Bơta pal sền gròi là Jơnau rơcang cih Adat dia tac phan krơi is cih: dia tac phan krơi is gơwèt mờ ơlak, ƀièr rơp sơn đờm ngui khà dia gơguh sùm bơh nam 2026 tus nam 2030 rơp pal kong dia gơguh tus 100%.

Tàm pơrjum tă pơgồp jơnau đơs tàm rơndap lơh adat dia tac phan krơi is (tam gơl) bơh Mpồl tam klac ală mpồl lơh sa kă bro bơcri priă lơgar ndai pơgồp bal mờ ƀăo Cau ala mat làng bol bơyai lơh pa do, ală cau geh jơnau git wă jrô, cau ala mat mpồl lơh sa kă bro neh geh ală jơnau dan, jơnau đơs nàng gàr niam gơnoar kuơ đah Cíñ phủ mờ mpồl lơh sa kă bro. Jat hơ̆, ală mpồl lơh sa kă bro ring bal mờ gùng dà bơh Đảng, Dà lơgar dê tàm broă ngui broă lơh dia tac phan krơi is nàng sền gàr pràn kơldang să jan làng bol, tơrmù ƀà broă ngui ală bơta phan lơh aniai tus pràn kơl dang să jan mờ ơlak, ƀièr, jràu.