Dơ̆ lùp mờ hơ jơnau lùp geh bơyai lơh bơh drim do (21/08) tus jơh drim ngai hìng (22/08). Tàm drim do, tơnơ̆ mờ tŭ Củ tịc Quốk hội ồng Trần Thanh Mẫn đơs sơn đờm pơrjum, Kwang atbồ gơnoar cih Quốk hội, Atbồ Cơl dŭ lơh broă Quốk hội ồng Bùi Văn Cường yal Jơnau yal tơrgùm bal tơngu me lùp sền bơh Mpồl duh broă Jơi bơtiàn, ală Anih duh broă bơh Quốk hội, Jơnau yal bơh Mpồl Làng bol kơ̆p kờñ bè broă lơh jăt ală jơnau lơh nền bơh Anih duh broă Lơh kơnòl, broă sùm Quốk hội dê bè broă jăt sền mìng dùl tơngu me mờ lùp hơ jơnau lùp bơh bồ tơngai lơh broă Quốk hội khoă XV tus jơh nam 2023.

Tơnơ̆ mờ hơ̆, ală kwang bàng Quốk hội geh lùp ală ƀộ trưởng, kwang atbồ gah lơh broă dà lơgar bè broă lơh jăt ală jơnau lơh nền bơh Anih duh broă Lơh kơnòl broă sùm Quốk hội khoă XV dê tus jơh nam 2023 gơwèt mờ mpồl gah broă lài ngan, tàm hơ̆ geh ală gah broă: broă lơh sa suơn sre mờ bơtàu tơnguh ƀòn lơgar; kă bro phan; niam chài, tàp pràn să jan mờ lòt nhơl.