VOV4.K’ho - Drim òr (11/02), tàm gùng sồ 58 Quán Sứ, ƀòn dờng Hà Nội, Anih jơnau đơs Việt Nam bơyai lơh tơnkah Ngai pờ tơlik jơnau đơs dunia mờ tơngu me “Pờ tơlik jơnau đơs mờ broă pin dờn” mờ cri bơyai kwơ màng bè gơnoar bal mờ gùng dà broă lơh bơh Anih pờ jơnau đơs tàm rài pa nàng pờ tơlik jơnau đơs sùm là phan pin dờn tus mờ cau iăt.

Tàm dơ̆ cri bơyai, ală cau jăk chài tàm lơgar mờ dunia đơs tờm, pờ tơlik jơnau đơs gam sùm là jơnau tơngit mhar, pin dờn, broă gơtìm anih pờ ơnàng, mơya pal pơn jăt tai tơnguh bơta pràn is nàng hòi jà rơlao tai tus mờ cau iăt. Mờ broă tơnguh bơtàu bơh kông nghệ, Pờ tơlik jơnau đơs gam là cơng tàng bè broă uă bơta niam mờ uă bơta broă lơh, uă jơnau đơs mờ uă bơta bơh tàm cau lơh broă pờ tơlik jơnau đơs. Ală cau jăk chài pờ tơlik jơnau đơs đơs là, sră ƀăo đơs bal mờ pờ tơlik jơnau đơs pal geh tam gơl pa să tờm, tơnguh ală bơta pràn is bơh ală bơta sră ƀăo geh is, ai jơnau tơngit mhar, di pal, pin dờn mờ kwơ màng là pal niam nàng tơnguh nùs nhơm pin dờn bơh cau iăt dê.

Cau mblàng Ndong Brawl