Ală jơnau cih kung đơs uă ală broă pơgồp bal dờng màng bơh Tổng Ƀí thư ồng Nguyễn Phú Trọng dê tàm broă bơ̆t bơtàu dà lơgar, broă rơcang tam dră mờ cau sa kuề sa koà mờ gùng dà broă lơh bal mờ lơgar ndai niam chài tơnguh uă bơngă bơh lơgar Việt Nam dê tàm dunia. Anih yal tơngit lơgar Lào, Pang ƀăo Vientiane, bal mờ uă pang ƀăo dờng lơgar Lào ndrờm tơlik uă rùp, jơnau cih bè Mpồl kwang bàng ala măt kấp dờng Đảng, Dà lơgar Lào dê geh ồng Tổng Ƀí thư, Củ tịc lơgar Lào ồng Thoong-lun Sisoulith lam bồ tus ies tơ̆p ƀồc Tổng Ƀí thư ồng Nguyễn Phú Trrọng.

Tàm jơnau tơngit bè dơ̆ ies tơ̆p ƀồc Tổng Ƀí thư ồng Nguyễn Phú Trọng, Pang ƀăo Khmer lơgar Campuchia dê geh jơnau cih, Tổng Ƀí thư ồng Nguyễn Phú Trọng dờp geh uă jơnau kờñ gơboh bơh làng bol lơgar Việt Nam mờ mpồl bơtiàn tàm ală lơgar dê kơnờm mờ ală jơnau hơ geh lơh jăt lài kung bè tơnơ̆ gơwèt mờ broă bơtàu tơnguh dà lơgar mờ gơnoar dờng màng tàm ală broă lơh ngan tơnguh bơta git gơ̆p mờ ală lơgar. Sputnik lơgar Nga kung geh ală jơnau cih đơs nền, “Tổng Ƀí thư ồng Nguyễn Phú Trọng neh ai geh bơnàng jăk kơl jăp bơta git gơ̆p đah lơgar Việt Nam mờ lơgar Nga”. “Bơh lơgar Cuba, jơnau ưn ngài pơyoa tus Tổng Ƀí thư ồng Nguyễn Phú Trọng”, là tơngu me jơnau cih geh cih tàm pang sơnrờp ngan bơh pang ƀăp Gramma lơgar Cuba dê. Jơnau cih neh đơs tus ală broă pơgồp bal dờng màng ngan bơh Tổng Ƀí thư ồng Nguyễn Phú Trọng dê tàm broă bơtàu tơnguh dà lơgar bal mờ làng bol lơgar Việt Nam, kung ai “bơta git gơ̆p tam klăc bal, oh mi” ngai sơlơ kơl jăp đah làng bol đảng Kộng sản mờ Cíñ phủ bàr lơgar dê. Anih yal tơngit Reuters lơgar Anh kung geh jơnau tơngit nền nòn bè dơ̆ ies tơ̆p ƀồc Tổng Ƀí thư ồng Nguyễn Phú Trọng dê, mờ broă tus bal bơh uă mpồl kwang bàng lơh broă mờ lơgar ndai, ala măt ală mpồl lơh broă bal mờ bơyô bơh ală lơgar dê.