Kụm tàm pơrlòng ală càr Tây Nguyên mờ tiah kềng gah dà lềng tàm gùl lơgar geh 10 càr: Gia Lai, Kon Tum, Dăk Lăk, Dăk Nông, Lâm Đồng, Quảng Nam, Quảng Ngãi, Bình Định, Phú Yên, Khánh Hòa, geh bă ù geh is rlau 87 rbô 180 kơi sồ vuông (geh 26,3% bă ù gùt lơgar). Tàm nam lài, ală càr tàm Kụm tàm pơrlòng tàm ală càr Tây Nguyên mờ tiah kềng gah dà lềng tàm gùl lơgar lam lơh niam ală srơh tàm pơrlòng bè: Sơlơ lơh pràn bơtàu tơnguh rơndap tap sèng phan bơna ring bal, tam gơl pa; lam lơh tềm pềr, rơcang sơndră pơhì pơhà. Bơh srơh tàm pơrlòng “Gùt lơgar pơgồp bal bơta pràn bơt bơtàu ƀòn lơgar pa” tơngai bơh nam 2021 tus nam 2025, muh mat tiah ƀòn lơgar tàm ală càr tàm Kụm tàm pơrlòng rơhời geh bơta tam gơl, rơndap tap sèng phan bơna geh tă priă lơh pa, lơh niam; rài kis phan bơna, nùs nhơm bơh làng bol dê geh tơnguh niam.

Đơs tàm pơrjum, mò Võ Thị Ánh Xuân, Atbồ ing Củ tịc lơgar jờng rơ broă lơh tàm pơrlòng, pà khà jờng bơh ală càr gơ wèt Kụm tàm pơrlòng ală càr Tây Nguyên mờ tiah kềng gah dà lềng tàm gùl lơgar. Mò Võ Thị Ánh Xuân sồr ală càr pơn jat tai lam lơh niam broă lơh tàm pơrlòng pà khà jờng pal di mờ bơta geh ngan, gơ mut ngan ngồn tàm rài kis mờ gơ gơs là bơta gơn kơnờm ai bơtàu tơnguh dà lơgar in.