Tàm dơ̆ wă rò, Atbồ ing Củ tịc lơgar mò Võ Thị Ánh Xuân jờng rơ uă ngan Ngân hàng dunia neh geh tă pơgồp dờng màng tàm broă dong kờl bơtàu tơnguh mờ tơnguh uă khà kis bơh làng bol tàm ală lơgar tàm mpồl tàm dunia dê. Gơwèt mờ lơgar Việt Nam, Ngân hàng dunia là dùl tàm 3 lơgar lơh broă bal bơtàu tơnguh, ai priă càn lơgar ndai dờng ngan rlau jơh, lơh geh pơgap 35% priă càn lơgar ndai bơh lơgar Việt Nam dê.

Atbồ ing Củ tịc lơgar jờng rơ uă ngan bơta dong kờl bơh mò Carolyn Turk mờ Ngân hàng Dunia dê lời ai lơgar Việt Nam in, tàm hơ̆ geh uă broă lơh geh kwơ, bè: lời ing tơm dồs mhar ală bơnah priă càn; neh geh jơnau bơceh lơh dong kờl lơgar Việt Nam rcang kơryan lài kòp Kovid-19, dong lơgar Việt Nam mhar ngan bơtàu tơnguh wơl lơh sa tơnơ̆ kòp dờng. Kwơ màng, Ngân hàng Dunia neh tơrgùm priă jền pơgap bơh 1 tus 2 tơmàn dolar Mỹ dùl nam ai bơcri priă bơtàu tơnguh bơh lơgar Việt Nam dê tàm broă lơh jat ală rơndăp broă lơh kwơ màng. Tàm tơngai tus, Atbồ ing Củ tịc lơgar sồr Ngân hàng Dunia pơn jat tai lơh broă bal niam, dong kờl Việt Nam tàm broă lơh bơtàu tơnguh Dà lơgar.