VOV4.K’ho - Drim òr (11/01), Ƀan Đối ngoại Dà lơgar bơyai lơh pơrjum tơn jơh broă lơh nam 2021 mờ lơh jăt gùng dà kơnòl broă lơh nam 2022. Tàm nam pa do, bŭ lah gơtìp uă kal ke tàm broă lơh jăt ală broă lơh bal mờ lơgar ndai, mơya Ƀan Đối ngoại Dà lơgar neh lơh gơs niam ală kơnòl di jăt mờ gơnoar, kơnòl bơh să tờm dê.

Nam 2022, Ƀan Đối ngoại Dà lơgar ai kơnòl cíñ trị là ai lài lơh jăt rơndăp broă lơh jăt Cỉ thị sồ 32 tơngai bơh nam 2021 tus 2025 neh geh Ƀan Ƀí thư kĭ; Cỉ thị bơh Ƀan Ƀí thư bè broă lơh bal mờ lơgar ndai làng bol nàng tơnguh uă cồng nha bơh gàr bơta tờm là lơh broă bal mờ lơgar ndai Đảng dê mờ lơh broă bal mờ lơgar ndai làng bol dê. Ƀan geh pơn jăt tai tơnguh uă rơlao tai broă lơh jŏ jòng tàm broă bơto pơlam bơ̆t bơtàu ală broă lơh bal mờ lơgar ndai bơh kwang bàng đơng lam tờm, kwang đơng lam dờng Đảng dà lơgar tàm broă pơlam, sền nàng git rơndăp broă lơh bal mờ lơgar ndai geh ai tàm broă tơrgùm bal broă lơh jŏ jòng mờ lơgar ndai, geh bơta tờm, bơta kuơ.

Cau mblàng Ndong Brawl