Nghị quyết sồ 59 bơh Ƀộ Cíñ trị là tơngu me, cơng tàng kwơ màng nàng Quốk hội, Cíñ phủ mờ ală ƀộ, gah lơh broă dà lơgar gơrềng bal bơ̆t bơtàu mờ ai geh ală kơrnoăt pal jăt, broă lơh nàng lơh mờ tơnguh uă ngan ală bơta geh, bơta pràn bơh ƀòn dờng dê nàng tus nam 2030 ƀòn dờng Cần Thơ là ƀòn dờng geh tiah niam, gơguh jăk, pa geh uă bơta niam chài dà dờng tiah ring dà dờng Cửu Long dê.

Jơnau kờñ, kơnòl broă geh ai gơwèt mờ Mpồl kwang bàng jăt sền là sền wơl ală cồng nha lơh jăt ală jơnau kờñ, jơnau geh ai, kơnòl broă, broă lơh; ai gŏ ală broă gam gơlik geh, ờ pràn mờ tài bơta lơi gơlik geh tơnơ̆ mờ rơlao 2 nam lơh jăt Nghị quyết. Jăt ồng Phạm Văn Hiểu, Phó Ƀí thư Duh broă sùm Thàñ ủy ƀòn dờng Cần Thơ đơs, do là dơ̆ nàng ƀòn dờng geh kơlôi wơl, sền wơl tàm tơngai do, lơh geh broă lơi mờ ờ hềt lơh geh broă lơi, dong kờl ƀòn dờng do tơnguh ală bơta neh lơh geh, tơmù ală bơta gam ờ pràn, kal ke, lơh pràn broă bơtàu tơnguh ƀòn dờng dê.