Tài gơrềng bơh mìu càl rơbŭt dờng sồ 03, dà cò mờ tơrlah ù tàm ờ uă tiah neh lơh 200 nă cau gơtìp chơ̆t mờ jòi ờ gŏ ƀồc; 760 nă cau gơtìp sồt să. Bă ù sre lơh kòi, phan tam bal mờ tờm chi sa plai gơtìp gơbam dà, hoàc huơr tus 200 rơbô lồ.

Tàm ală tiah geh mìu càl rơbŭt dờng lòt gan, git nđờ jơ̆t rơbô nơm hìu gơtìp tơrlah, gơpồ rơkàng, tơrlah uă. Kờp dŭ hoàc huơr tài bơh mìu càl rơbŭt dờng lơh tus git nđờ jơ̆t rơbô tơmàn đong. Mờ nùs nhơm “dong kờl bal”, “nha ngan dong kờl nha sèt”, Ƀan Tuyên giáo Dà lơgar hòi jà gùt kwang bàng, kông cứk, viên cứk, cau lơh broă dờp bal Jơnau hòi jà bơh Anih duh broă Mặt trận Dà lơgar Việt Nam, tus bal pơgồp bơta pràn, dong kờl bè nùs nhơm bal mờ phan bơna nàng dong kờl làng bol ală càr gơtìp hoàc huơr bơh mìu càl rơbŭt dờng dà tih dà cò sơrlèt mờ kal ke. Tơl nă kwang bàng, kông cứk, viên cứk, cau lơh broă dong kờl ờ uă ngan 01 ngai priă nhai nàng tă pơgồp dong kờl làng bol gơtìp kal ke bơh trồ tiah lơh aniai.