VOV4.K’ho- Drim ngai 13/01, tàm Hà Nội, Ƀan Zân vận dà lơgar bơyai lơh pơrjum pờ tơlik tơn tàm internet gùt lơgar tơn jơh broă lơh hòi jà làng bol mờ sền sơ wì cồng nha lam lơh nam “Chồl pràn lam lơh kơrnuat làng bol lơh tờm tàm kấp hơ đơm” nam 2021, lam lơh kơnòl broă nam 2022. Ủy viên Ƀộ Cíñ trị, Thường trực Ƀan Ƀí thư ồng Võ Văn Thưởng neh tus bal mờ đơng lam pơrjum.

Đơs đơng lam tàm pơrjum, ồng Võ Văn Thưởng sồr gah hòi jà làng bol pal rơcang lài git gŏ, đơs di tŭ bơta kơp kờñ dipal bơh làng bol dê tus mờ kấp ủy, gơnoar atbồ sền sơ wì bơsong, ngan là ală broă gơ rềng tơn tus rài kis, broă lơh, priă lơh geh bơh làng bol dê. Mờ kung pal git wă uă, tơl làm rlau bè nùs nhơm “Làng bol là tờm”, tơnguh bơta pràn bơh làng bol dê, bơta pràn tam klac dờng gùt jơi bơtiàn. Tơnguh srơh tàm pơrlòng hòi jà làng bol jak bơh anih duh broă cíñ trị dê, pơgồp bal mờ ală dơ̆ lam sồr, srơh tàm pơrlòng kờñ gơboh dà lơgar tàm ală gah, gàr bơta ngan ngồn, geh cồng nha.

Cau mblàng K’Duẩn