Kơco tê tus mờ ală dra bơkàu giấy gam lì bơkàu niam bơnĕ ngan jăt kềng 2 gah gùng ƀòn Buôr, xã Hoà Xuân, ƀòn dờng Buôn Ma Thuột, mò H’Lép Niê gam hòi là mè Khiết pà gĭt, geh gùng bơkàu do, dà kơlhề uă ngan gơ rê mờ Phó Ƀí thư Ci ƀộ, Kwang ătbồ ƀòn là bàp Tháp: Tàm ƀòn Buôr, xã Hoà Xuân do, tàm ală dơ̆ pơrjum ƀòn tàm hìu mpồl bơtiàn, kwang ătbồ ƀòn mblàng yal làng bol in, jơh tơl nă cau, jơh tơl hìu lơh ai gơl gùng in sàng goh niam bơnĕ, tam bơkàu tam ñhơ̆t, tài bè hơ̆ den tàng làng bol chờ hờp ngan. Añ kung là dùl nă làng bol sơl, iăt kwang ătbồ ƀòn mblàng yal bè hơ̆, añ kung lơh jăt sơl, tam bơkàu lơh niam.

Ờ mìng hòi jà làng bol tam bơkàu lơh niam ƀòn lơm, bàp Tháp, Kwang ătbồ ƀòn gam lòt lài tàm broă tam gơl rơndăp tăp sèng chi tam bơh broă tam tàm bơrlŭ bal mờ tờm tiêu, sầu riêng tàm sươn kơphê. Tơnơ̆ tŭ broă lơh geh cồng nha, bàp Tháp neh jơh nùs hòi jà làng bol tàm ƀòn đòm jăt ngui bơta jak chài măy mok tàm broă tam phan, ròng phan mờ tus bal lơh ală broă lơh bơtàu tơnguh lơh sa. Ồng sùm sền gròi còp rơwàng, pơndờm pơnđiang ală hìu rƀah, hìu bơnhă geh dà kơlhề mờ dà lơgar, hìu bơnhă ơm kis is dùl nă să geh rài kis kal ke...bơh hơ̆ geh ală broă dong kờl dipal ngan dong kờl kơ̆ kơl jăp rài kis. Bi Y Sol Buôn Dáp là làng bol ơm tàm ƀòn Buôr, đơs: Tàm ƀòn do, bàp Tháp là kwang ătbồ ƀòn dong ai làng bol in lơh ală sră pơ àr, pơlam làng bol in lơh sươn lơh mìr, lơh sră pơ àr tàm Ủy ƀan Ñân zân xã, dong ai làng bol in bơtàu tơnguh lơh sa, dong tơnguh uă rài kis làng bol tàm tiah do in.

Kah wơl tơngai geh gơnoar ătbồ tiah do mờ làng bol ƀòn Buôr pin dờn pồ lơh Phó Kwang ătbồ ƀòn hơ̆ sồng guh lơh Kwang ătbồ ƀòn, bàp Tháp yal, tàm nam 2011, tàm ƀòn geh bàr pe nă cau iơh tus đơs bu ba, mblàng yal gơlềng gơlàng, pơndờm pơn jồ, hoài jà làng bol lòt jăt gùng lòt tìs ngan, să tờm bàp Tháp kung kơlôi rơcăng ngan sơl. Tơnơ̆ tŭ đal gĭt di tìs, bàp Tháp neh bal mờ gơnoar ătbồ tiah do tus tơl hìu hòi jà, mblàng yal đơs nàng làng bol in gĭt làng bol in wă loh geh. Kơnờm bơta jơh nùs jơh tồr hơ̆, bàp Tháp geh gơnoar ătbồ tiah do mờ làng bol tàm ƀòn pin dờn jàu lơh gơnoar broă Phó Kwang ătbồ ƀòn, hơ̆ sồng Kwang ătbồ ƀòn, hơ̆ sồng guh lơh Phó Ƀí thư Ci ƀộ ƀòn. Cèng kơnòl broă kơn jơ̆ kơn jŭt tềng pơnì, bàp Tháp đơs is tàm nùs là rơ̆p lơh ngan pơđơl pràn uă rlau tai, rơ̆p lam lài lơh krơh rlau tai nàng dipal mờ bơta pin dờn hơ̆: Añ đơs mờ làng bol pal sền tĕ tàm añ do do, bañ iăt jăt cau ndai pơrlồm pơn jồ, gơnoar ătbồ ờ gŏ tam cah ờ rờm làng bol he ờ. Bol he pal kơlôi tus rài kis he lài ngan, geh rài kis niam, hìu đam niam tre, lơh sa bơtàu tơnguh, piang sàu hờm ndul. Làng bol kung gŏ tŭ do dà lơgar bơcri priă lơh bơtơ̆t rbòng dà, bol he ƀồm dà tuh dà lơh sre, lơh gùng sàng goh niam bơnĕ, dà lơgar ờ gŏ sang lời làng bol he ờ den tàng làng bol pal dòn kơnờm.

Đơs bè gơnoar broă bơh bàp Tháp, Phó Ƀí thư Ci ƀộ, Kwang ătbồ ƀòn Buôr dê, ồng Nguyễn Đức Thuận, Ƀí thư Đảng ủy xã Hoà Xuân, đơs: Bàp Tháp là cau gam kơnòm să, mơkung tơryăng tơryồng bơceh lơh mờ dờng màng rlau là jơh nùs jơh tồr mờ làng bol, ồng geh uă bơta tam gơl pa, ngan là tàm ală tŭ bơ̆t bơtàu ƀòn lơgar pa. Ƀòn Buôr lài do kung là ƀòn kwơmàng, tŭ do den ơruh pơnu pah nam lơh jăt adat kơnòl broă ling klàng, jàu ling den sơrlèt khà jàu hơ̆ sồng ală srơh bơh xã dê lam lơh ồng kung jơh nùs lơh jăt niam ngan sơl.

Ală tă pơgồp bơh bàp Tháp, Phó Ƀí thư Ci ƀộ, Kwang ătbồ ƀòn Buôr dê tàm tơngai lài ờ mìng pơgồp bơnah lơh tam gơl rài kis làng bol tàm ƀòn dê mờ gam lơh kơ̆ kơl jăp bơta pin dờn bơh làng bol dê tàm Đảng, Dà lơgar; là anih kơldìng pin dờn, là cau lơh kòn gùng đah kâp ủy, gơnoar ătbồ mờ làng bol tàm broă bơ̆t bơtàu ală anih lơh broă cíñ trị, lơh geh bơta gơn kơnờm bơtàu tơnguh lơh sa- mpồl bơtiàn tàm ƀòn lơgar.