Đơs kah wơl kah yau, kwang đơng lam bồ càr Bến Tre đơs tus bơta kuơ, bơta dờng màng bơh srơh ntàu tam lơh tàm càr Bến Tre dê 63 nam lài, ngai 17/01/1960 là dùl pơn rơ jak niam ngan bè bơta ntàu guh bơh làng bol dê; bơh tê gời, mờ bơta kờñ gơboh dà lơgar, kờñ lơngăp lơngai is, khat gơboh, tềng đap bơta đơng lam bơh Đảng dê, làng bol Bến Tre neh ntàu tam lơh mờ bol sò tơm dùl bă bơceh pa mờ geh cồng nha, lơh gơs dơ̆ ntàu tam lơh crih crài ngan, bè bơta àng sòl pơn đàng tàm rài kah yau dờng màng jơi bơtiàn dê.

Di tơngkah 63 nam Ngai Bế Tre ntàu tam lơh, Ủy ƀan Ñân zân càr Bến Tre jàu pà khà jờng “Làng bol ntàu tam lơh pơn rơ jak” mờ “Làng bol ntàu tam lơh pơn iờ să” dơ̆ 3 nam 2023 ai 10 nă cau dùl nă să neh geh cồng nha jak ngan, tă pơgồp ai bơt bơtàu mờ bơtàu tơnguh càr Bến Tre in.