Mpồl ling là anih kơldìng kơ̆ kơl jap ai làng bol in, lơh bơta tam klăc đah ling klàng làng bol ngai sơlơ đềt mềr rlau.

Hìu bơnhă ồng Hồ Văn Thiếp, ơm tàm thôn Tru- Chaih, xã Đông Sơn, kơnhoàl A Lưới, càr Thừa Thiên- Huế gơwèt hìu bơnhă rƀah bàr pe nam do. Hìu bơnhă ờ geh ù dòr nàng lơh sa, 2 nă ùr bơklau lòt lơh apah, jòi tơl đông priă geh bơh broă lòt lơh apah. Pa do, Pôs đồng ling sền gàr tiah nhàr lơgar mpồng nhàr lơgar A Đớt dong kờl hìu bơnhă ồng in dùl nơm kơn rồ me mờ bơto pơlam broă lơh sa. Ồng Hồ Văn Thiếp mờ uă hìu bơnhă tàm do ưn ngài ngan bơta dong kờl bơh ală wa Mpồl ling sền gàr tiah nhàr lơgar dê.

Ồng Hồ Văn Thiếp đơs: “Ưn ngài ngan Pôs đồng ling sền gàr tiah nhàr lơgar neh dong kờl ai làng bol rƀah in là niam ngan. Kơ̆p kờñ là tơnơ̆ do he ròng siam niam, nàng hìu bơnhă sơr lèt gan kal ke”.

Pa do, Gah đơng lam Mpồl ling sền gàr tiah nhàr lơgar càr Thừa Thiên- Huế pơgồp bal mờ Mpồl tam klăc cau ùr càr sơnđờm mut lơh “Hìu ơm ram mhŭ tiah nhàr lơgar” pà hìu bơnhă rƀah tiah nhàr lơgar in. 4 hìu bơnhă rƀah tàm ală xã Đông Sơn, Lâm Đớt, A Roàng mờ Hương Nguyên bơh kơnhoàl A Lưới dê geh dong kờl tơl hìu bơnhă 60 tơlak đong nàng lơh hìu. Kwang bàng, cau ling ală Pôs đồng ling sền gàr tiah nhàr lơgar lơh pôs đồng tàm ù tiah do dê dong làng bol lơh hìu, sơr băc mhar bè ờs wơl rài kis. Bi Huỳnh Thị Bé, ơm tàm thôn Chi Lanh- A Roh, xã Lâm Đớt, kơnhoàl A Lưới đơs là, Mpồl ling sền gàr tiah nhàr lơgar sùm dong kờl làng bol, bè lơh hìu ơm, pà kơn rồ me, sur me, dong kờl làng bol kòn cau bơtàu tơnguh lơh sa, tơn jơh jơgloh, tơrmù rƀah, lơh niam wơl rài kis.

Bi Huỳnh Thị Bé đơs: “Pôs đồng ling sền gàr tiah nhàr lơgar A Đớt dong kờl ală bơta ai làng bol in niam ngan. Ală bi dong kờl làng bol uă ngan, bè lơh ală broă bơt bơtàu ai hìu bơnhă rƀah in, dong kờl kơnrồ me ai ală hìu bơnhă rƀah in, ai ală bơta nàng làng bol in sơr lèt gan rƀah. Pah nam, kung geh hìu bơnhă lik klàs rƀah sơl”.

Tiah nhàr lơgar càr Thừa Thiên- Huế gam uă kal ke, lơh sa lơyài bơtàu tơnguh. Den tàng, mpồl ling sền gàr tiah nhàr lơgar càr Thừa Thiên- Huế sùm lòt bal dong làng bol tơn jơh jơgloh, tơrmù rƀah. Đại úy Võ Xuân Minh, Cíñ trị viên phó Pôs đồng ling sền gàr tiah nhàr lơgar mpồng nhàr lơgar A Đớt, Mpồl ling sền gàr tiah nhàr lơgar càr Thừa Thiên- Huế đơs, mpồl ling drơng 3 xã Lâm Đớt, Đông Sơn, Hương Phong, kơnhoàl A Lưới mờ rlau 1 rơbô 890 hìu bơnhă, tàm hơ̆ geh rlau 1 rơbô hìu bơnhă rƀah. Mpồl ling neh pơgồp bal mờ Mpồl cau lơh broă sa, Mpồl cau ùr kơnhoàl, gĭt loh bơta kal ke bơh tơl hìu bơnhă dê, bơh hơ̆ dong kờl làng bol bơtàu tơnguh lơh sa.

Đại úy Võ Xuân Minh đơs: “Tŭ do, Pôs đồng gam lơh niam mờ lơh jat ală broă lơh “Dong kờl oh tus hìu bơsram”, “Kòn ròng Pôs đồng ling sền gàr tiah nhàr lơgar”, “Yang phe kờñ gơboh”... Mpồl ling sùm dong kờl 2 hìu bơnhă, tơl hìu bơnhă 20 kĭ phe dùl nhai, den hòi jà ală cau geh nùs nhơm niam dong kờl ală broă lơh bè lơh hìu ơm ai cau rƀah tiah nhàr lơgar in, nam 2023 lơh 2 nơm hìu ơm, tơl nơm hìu kờp priă 60 tơlak đong. Bơdìh hơ̆, Pôs đồng kung dong kờl tai bè ngai lơh broă dong làng bol lơh hìu”.

Tơngai pa do, Mpồl ling sền gàr tiah nhàr lơgar neh pơgồp bal mờ gơnoar atbồ ală tiah lơh uă broă lơh, broă lơh dong kờl làng bol, bè: “Mpồl atbồ is gùng tiah nhàr lơgar, jrong sơn tơ̆p tiah nhàr lơgar bơh Dà lơgar dê”, “Đảng viên Pôs đồng ling sền gàr tiah nhàr lơgar drơng broă ală hìu bơnhă tàm tiah nhàr lơgar”, “Yang phe nùs nhơm”, “Dong kờl oh lòt bơsram”, “Lòt bal mờ cau ùr tiah nhàr lơgar”... Bơh hơ̆, sơm bat tê bal bơt bơtàu ƀòn lơgar pa pơgồp bal mờ tơn jơh jơgloh tơrmù rƀah kơ̆ kơl jap tàm ù tiah do dê.  Đại tá Đặng Ngọc Hiệu, Phó Cíñ ủy Mpồl ling sền gàr tiah nhàr lơgar càr Thừa Thiên- Huế pà gĭt, pah nam Mpồl ling sền gàr tiah nhàr lơgar càr lơh rlau 50 nơm hìu jàu pà làng bol kòn cau rƀah tàm tiah nhàr lơgar in. Kwang bàng ală Pôs đồng ling sền gàr tiah nhàr lơgar lơh niam broă lơh mblàng yal, hòi jà mờ bơto pơlam làng bol kòn cau tam gơl phan tam, phan ròng, brồ guh tơn jơh jơgoloh tơrmù rƀah kơ̆ kơljap.

Đại tá Đặng Ngọc Hiệu đơs: “Oh mi tus bal mờ ală hìu bơnhă làng bol nàng mblàng yal, hòi jà, den hơ̆ sồng bơto pơlam làng bol lơh broă lơh sa nàng bơtàu tơnguh lơh sa- mpồl bơtiàn. Kung tàm bơta broă lơh mờ oh mi hòi jà den sền gĭt bơta pràn halà bơta chài bơh làng bol dê nàng bơyai ai làng bol in lơh sa, kă bro, lơh ală broă drơng ala, jơnau kờñ ndŭt ndơl là bơtàu tơnguh lơh sa”.