Đơs tàm dơ̆ tìp măt, ồng Phan Đình Trạc, Kwang bàng Ƀộ Cíñ trị, Ƀí thư Đảng Dà lơgar, Kwang ătbồ Ƀan Nội cíñ Dà lơgar đơs là, ală jơnau đơs, jơnau dan, jơnau sồr bơh cau tĕ khà dê là dipal ngan. Mpồl kwang bàng Quôk hội càr Lâm Đồng rơ̆p iăt kơno, tơrgùm jơh wơl mờ jun yal mờ Quôk hội in tàm dơ̆ pơrjum tus.

Is ồn broă lơh rơcăng sơndră sa kwề sa kwà, ồng Phan Đình Trạc pà gĭt, bơh bồ nam tus tŭ do, jơh gùt lơgar neh yal yă, lùp khàu rlau 1 rbô 800 dơ̆, mờ 3 rbô 493 nă cau gơtìp yă bè ală tìs sa kwề sa kwà, lơh sa mờ gơnoar broă, gơguh 63,8% khà dơ̆ mờ 44,8% khà cau gơtìp yă pơndrờm bal dùl tŭ mờ nam lài. Broă lơh rơcăng sơndră sa kwề sa kwà gam pơn jăt tai geh lam lơh jăt kràñ cê, jơh nùs, ờ rơngòt, ờ ơm rlô, ờ geh anih kơryan ờ ai mờ ờ geh ơm bơdìh.