VOV4.K’ho - Kờñ rơcang ai pơrjum dơ̆ 3, Quốk hội khoă 15, mho òr (28/04), ồng Phan Đình Trạc, Kwang geh jơng tàm Ƀộ Cíñ trị, Ƀí thư Đảng dà lơgar, Kwang atbồ Ƀan Nội cíñ dà lơgar bal mờ ală kwang bàng ala măt Quốk hội càr Lâm Đồng neh geh dơ̆ tìp mờ cau tĕ khà tàm xã Xuân Thọ, ƀòn dờng Dà Làc.

        Ƀí thư Đảng dà lơgar ồng Phan Đình Trạc tìp mờ cau tĕ khà tàm ƀòn dờng Dà Làc, càr Lâm Đồng

Tàm dơ̆ tìp, ala măt Mpồl kwang bàng Quốk hội càr Lâm Đồng neh yal bè ală tơngu me tờm bơh pơrjum tus, mờ yal cồng nha lơh sa mpồl bơtiàn quý 1 nam 2022. Jăt mờ hơ̆, bŭ lah gơrềng bơh kòp kovid-19, mơya kơnờm mờ broă lơh jăt ndrờm bal uă broă lơh tàm bơta bè ờs pa, lơh sa mpồl bơtiàn dà lơgar neh mhar brồ guh wơl. Tàm hơ̆, gơguh GDP geh niam, kờp dŭ geh 5,03%, tiah broă lơh drơng ala gơguh 4,58%, uă rơlao mờr 1, 5 dơ̆ pơn drờm mờ tŭ do ală nam bơh 2020 - 2021. Mìng is càr Lâm Đồng, tă dia tàm kes priă dà lơgar tàm 4 nhai bồ nam geh rơlao 4 rơbô 700 tơmàn đong, gơguh 4, 76% pơn drờm mờ tŭ do nam lài; cau năc nhơl chờ gơguh rơlao 2 tơlăk 300 rơbô nă, gơguh 33% pơn ndrờm mờ tŭ do nam 2021. Cau tĕ khà yal geh ờ uă broă gơtìp kal ke pal geh ală kấp, ală gah lơh broă sền gròi mờ bơsong niam, hơ̆ là: broă ai sră dờp gơnoar ngui ù gam lơyài, broă ai rơndăp broă ù tiah gam ờ loh làng, ờ hềt di pal, priă bơcri lơh sa kal ke kờñ geh càn...

Cau mblàng Ndong Brawl