VOV4.K’ho- Ngan ngồn gờm chờ tơngkah kir sơnrai 91 nam Ngai crơng gơs Đoàn Ơruh pơnu Kộng sản Hồ Chí Minh dà lơgar, mho ngai 25/03, geh lơh dơ̆ tìp măt cribơyai broă pờ tơn tàm internet đah Ƀí thư dơ̆ sơnrờp Đoàn Ơruh pơnu Kộng sản Hồ Chí Minh dà lơgar ồng Nguyễn Anh Tuấn, Củ tịc Mpồl Tam klăc ơruh pơnu Việt Nam mờ đoàn viên, ơruh pơnu, kơnòm dềt tàm dơlam mờ bơdìh lơgar mờ tơngume “Kơ̆p kờñ ngan tă pơgồp- Bơta kis niam ơruh pơnu”.

Tàm dơ̆ tìp măt cribơyai, ồng Nguyễn Anh Tuấn iăt kơno jơnau kơlôi sơnơng, bơta kơ̆p kờñ bơh đoàn viên, ơruh pơnu dê, hơ ală jơnau lùp; iăt kơno ală jơnau sồr, jơnau dan, jơnau tă pơgồp bơh bơyô kơnòm să dê tàm dơlam mờ bơdìh lơgar; cribơyai bè gơnoar broă, kơnòl broă bơh Mpồl đơng lam Đoàn mờ đoàn viên, ơruh pơnu dê; tă pơgồp jơnau đơs nàng Mpồl đơng lam Đoàn tàm tŭ tus bal bơtàu tơnguh wơl, bơtàu tơnguh lơh sa dà lơgar tơnơ̆ tơngai gơtìp gơrềng bơh kòp dờng Kovid-19 dê; mơkung geh jơnau kờñ, broă lơh bơsong ai broă lơh Đoàn mờ srơh ơruh pơnu kơnòm pa tàu kơnòm dềt in tàm tơngai tus.

 Cau mblàng Lơ Mu K’Yến