Lài do, gơl gùng bơh rbàng Nước Lương tus thôn T6, xã Đak Mang, kơnhoàl  Hoài Ân, càr Bình Định dềt ngan. Mut tàm kàl mìu, uă tiah tàm gơl gùng do ngơr dà, làng bol lòt rê kal ke ngan. Bơh priă bơcri bơh rơndăp broă lơh sồ 4 bè bơcri priă bơt bơtàu phan bơna kwơ màng gơwèt broă lơh jơnau kờñ Dà lơgar bơtàu tơnguh lơh sa - mpồl bơtiàn tiah làng bol jơi bơtiàn dồ ết nă cau, tiah kơh bơnơm, Ủy ƀan Ñân zân kơnhoàl Hoài Ân, càr Bình Định bơcri 2 tơmàn 500 tơlak đong lơh niam wơl, pờ ơnàng gùng lòt bơh rbàng Nước Lương tus thôn T6 mờ lơh mờ bê tông gùng lòt tàm ală thôn tàm xã Đak Mang dê.

 Ồng Đinh Văn Thanh, làng bol xã Đak Mang, kơnhoàl Hoài Ân pà gĭt, gùng lòt pa geh lơh niam wơl, pờ ơnàng dong ai broă lòt rê, jun pơndiang phan bơna ƀuơn rlau: “Gùng bê tông geh lơh pa dong làng bol pơndiang kòi bơh ală ƀlàng sre rê tàm hìu làng bol dê ƀuơn ngan.Gùng lòt pa dong làng bol lòt rê lơngăp lơngai pơndrờm mờ bàr pe nam lài do”.

Kơnhoàl Hoài Ân sền gĭt bơcri priă lơh sir ală gùng lòt rê là “bơta pràn” kwơ màng ngan, pơgồp bơnah sơlơ bơtàu tơnguh lơh sa - mpồl bơtiàn tiah kal ke uă in, tiah sar lơgar ngài. Ală tiah rơndăp broă lòt gan, làng bol ndrờm dồ nùs bal ai ù lơh gùng. Ồng Nguyễn Xuân Phong, Phó Củ tịc Ủy ƀan Ñân zân kơnhoàl Hoài Ân, càr Bình Định pà gĭt, kơnhoàl gam pơgồp bal ală broă lơh jơnau kờñ Dà lơgar, lơh jat niam bơta ƀuơn bơta pràn bơh kơnhoàl dê lơh geh tiah lơh sa jat ală anih lơh bal geh kwơ mờ dong kờl rề ơnàng, tơnguh uă lơh bal ală anih lơh broă geh kwơ pơgồp bal mờ tăc bro phan bơna.

 Ồng Nguyễn Xuân Phong pà git: “Lam lơh jat rơndăp broă lơh bơtàu tơnguh lơh sa ai tiah làng bol jơi bơtiàn dồ ết nă cau in, dong kờl broă lơh, sơntìl phan tam, phan ròng mờ phan lơh sa suơn re nàng làng bol in ngui ală bơta gơguh jak pa tàm broă chài tam phan, ròng phan. Ală broă lơh tam phan jŏ nam geh tơnhào uă cèng wơl cồng nha lơh sa dờng ai tiah làng bol kòn cau in nàng lơh geh bơta kơlôi sơnơng mờ gĭt wă tàm broă tơnguh uă bơta niam phan bơna lơh sa suơn sre tàm tơl bă tiah tam phan mờ tơl bơta phan bơna dê. Bơh hơ̆, tơnguh priă lơh geh, bơtàu tơnguh lơh sa hìu bơnhă, tơrmù ƀà khà hìu bơnhă rƀah tàm ù tiah do dê”.

Nam 2024, broă rơndăp lơh priă lơh broă lơh jơnau kờñ Dà lơgar bơtàu tơnguh lơh sa- mpồl bơtiàn tiah làng bol jơi bơtiàn dồ ết nă cau mờ tiah kơh bơnơm càr Bình Định rlau 412 tơmàn đong. Tus ngai 31/05, ală tiah bơh càr Bình Định dê neh ai rlau 50 tơmàn 700 tơlak đong, lơh geh 12,3%. Broă lam lơh ală rơndăp broă lơh, rơndăp broă lơh dềt gơwèt broă lơh do kung gam bàr pe kal ke sơl. Ủy ƀan Ñân zân càr Bình Định pơn jat tai gàr sùm ală mpồl lơh broă ală gah bơh càr dê lơh dơ̆ lòt sền, jat sền cồng nha lơh jat mờ sồr lơh ngan, bơto pơlam, tă bơsong ală bơta gam geh, bơta kòl yan tàm tŭ lam lơh ală rơndăp broă lơh bơh broă lơh jơnau kờñ Dà lơgar dê.

Ồng Đinh Văn Lung, Kwang atbồ Mpồl lơh broă Jơi bơtiàn càr Bình Định pà gĭt, mpồl lơh broă sồr ală tiah sền gròi broă lơh mblàng yal, lơh mhar broă lơh jat ală rơndăp broă lơh, rơndăp broă lơh dềt bơh broă lơh jơnau kờñ Dà lơgar bơtàu tơnguh lơh sa- mpồl bơtiàn tiah làng bol jơi bơtiàn dồ ết nă cau mờ tiah kơh bơnơm. Ồng Đinh Văn Lung, đơs:  “Uă ngan broă dong kờl, den tàng là ală cau lơh broă mblàng yal jơnau pal gĭt. Dơ̆ 2 là pal geh uă mpồl cau, uă gah geh gơrềng tus ală kơnòl broă do nàng khi in mblàng yal ai làng bol in hơ̆ sồng làng bol wă. Broă lơh do uă kấp ủy kung neh jơh nùs lơh ngan rlau, geh kơnòl broă rlau tàm broă mblàng yal hòi jà nàng lơh bè lơi ai làng bol dờp geh bơta dong kờl bơh broă lơh do dê, cèng wơl rài kis ai làng bol in sơlơ niam rlau tai”.