VOV4.K’ho- Drim do 14/10, tàm Hà Nội, Ƀộ Cíñ trị, Ƀan Ƀí thư geh bơyai lơh pơrjum kơlôi sơnơng mờ lam lơh jăt Kơrnoăt bơh Ƀộ Cíñ trị dê bè gùng dà bơtàu tơnguh lơh sa- mpồl bơtiàn mờ sền gàr niam dà lơgar mờ bơta lơngăp lơngai tiah Tây Nguyên tus nam 2030, gùng dà tus nam 2045. Tổng Ƀí thư ồng Nguyễn Phú Trọng đơng lam mờ geh jơnau đơs sồr lơh kwơmàng tàm pơrjum.

Ƀộ Cíñ trị, Ƀan Ƀí thư bơyai lơh Pơrjum bơtàu tơnguh lơh sa mpồl bơtiàn, lơngăp lơngai sền gàr dà lơgar tiah dòr bơnơm tiah kơh bơnơm đah tô dà lơgar tus nam 2030, pơlam gùng dà tus nam 2045

Pa do, tus bal đơng lam mờ đơs tàm Pơrjum tơn jơh lơh jăt Kơrnoăt sồ 10 mờ Jơnau đơs pơndŭt sồ 12 bơh Ƀộ Cíñ trị dê bè bơtàu tơnguh lơh sa- mpồl bơtiàn mờ sền gàr niam dà lơgar mờ bơta lơngăp lơngai tiah Tây Nguyên, Thủ tướng Cíñ phủ ồng Phạm Minh Chính neh đơs sùm bàr pe jơnau bơsram mờng chài kwơmàng bè pal gĭt wă di mờ wil tơl bè gơnoar broă, anih mờ bơta kwơmàng bơh kơnhoàl ù tiah dê gơwèt mờ jơh gùt lơgar tàm jơh ală kâp, ală ngàñ; đơs loh bơtàu tơnguh tiah Tây Nguyên pal tơrgùm mờ pơgồp bal bơsong dùl ròt jơh bal bè cíñ trị, bồ tơngoh, lơh sa- mpồl bơtiàn, tiah ơm kis, sền gàr dà lơgar, lơngăp lơngai; gơ jăt bal bơtàu tơnguh lơh sa mờ sền gròi bơsong ală broă mpồl bơtiàn, broă kòn cau, broă jăt yàng; lơh tơngkah wơl jơnau pơñiờ să, ai bơta kwơ kah yau, niam chài, bơhiàn kăc màng, bơta kơlôi sơnơng, jơnau kơp kờñ brồ guh, pơđơl pràn is, lơh tờm is, tam klăc bal gơ gơs bơta gơn kơnờm bơtàu tơnguh; pal geh gùng dà, broă lơh gơhòi gơ jà priă jền bơtàu tơnguh, ngan là lơh broă bal đah dà lơgar mờ làng bol, priă jền mpồl bơtiàn mờ bơcri priă lơgar ndai.

Cau cih VOV Tây Nguyên- Cau mblàng Lơ Mu K’Yến