Tơnơ̆ tŭ iat cau ala mat kwang đơng lam bồ Thàñ ủy ƀòn dờng yal Sră yal dan jơnau đơs sồr lơh bè rơndap ù tiah, jơnau đơs bơh ală anih lơh broă dê tă pơgồp bè Jơnau neh lơh nền rơndap ù tiah, Ƀộ Cíñ trị neh tơrgùm cribơyai mờ ring bal bè ală gùng dà, broă lơh dờng, kuơmàng ai tơlik lài gùng dà broă lơh rơndap ù tiah ƀòn dờng Hồ Chí Minh.

Đơs pơn dut pơrjum, Tổng Ƀí thư, Củ tịc lơgar ồng Tô Lâm tơngkah, đơs nền bàr, pe bơta kuơmàng. Rơndap ù tiah pal lam lơh jat ngan ngồn ală gùng dà, broă lơh bơh Đảng, ală jơnau lơh nền bơh Mpồl duh broă Đảng dà lơgar, Ƀộ Cíñ trị, Ƀan Ƀí thư dê neh ai tơlik tàm tơngai lài. Rơndap ù tiah pal ai tơnggŏ loh làng gơnoar broă, bơta kuơ dờng ngan bơh ƀòn dờng Hồ Chí Minh dê, là tiah tờm lơh sa, niam chài, bơto bơtê mờ bơsram, jak chài – măi mok bơh gùt lơgar dê. Ƀộ Cíñ trị sồr Thàñ ủy ƀòn dờng Hồ Chí Minh tơrgùm đơng lam mhar lơh gơs rơndap ù tiah.