Tàm dơ̆ pơrjum do, Ƀộ Cíñ trị ring bal ai lơh jăt Kơrnoăt bè gùng dà, kơnòl broă bơtàu tơnguh ƀòn dờng Hồ Chí Minh mờ jơnau kờñ tus nam 2030 là ƀòn dờng drơng broă ala- lơh sa mờ măy mok pa ngan, lam lài bè lơh sa sồ, mpồl bơtiàn sồ, là tiah tờm lơh sa, priă jền, kă bro, jak chài măy mok, niam chài bơh tiah đah jum mat tơngai lik câu Á dê, mŭt gơrờm bal dunia jrô ơnàng làm uă. Tus nam 2045, gơ gơs là tiah tờm lơh sa, priă jền, drơng broă ala câu Á, là anih tus lơh gơkờñ ngan gùt plai ù, lơh sa, niam chài bơtàu tơnguh krơi is niam bơnĕ ngan, geh bơta niam rài kis uă; là tiah drà bơtàu tơnguh ndrờm pal mờ ală tiah drà dờng tàm dunia. Ƀộ Cíñ trị sồr ƀòn dờng pơn jăt tai đòm jăt bơhiàn kăc màng, tam klăc bal, pơgồp bal niam mờ ală anih lơh broă mờ ală tiah lơh jăt cồng nha Kơrnoăt. Bơtàu tơnguh lơh sa mhar, kơ̆ kơl jăp, tơnguh uă cồng nha lơh geh, bơta niam, cồng nha mờ bơta pràn jak tàm pơrlòng dunia; sơlơ lơh bal bơtàu tơnguh kơnhoàl ù tiah do; lơh pràn bơ̆t bơtàu tàm tơrbŏ phan bơna dùl ròt bal, gàr niam phan bơna lòt lài dùl cơnđoà.