Ƀộ trưởng Ƀộ Giao thông Vận tải ồng Nguyễn Văn Thắng neh geh jơnau đơs mờ sră nggal bè jơnau bơh tài gơbàn, bơta ờ niam kung bè jơnau hơ pơrgon bal mờ càr Gia Lai tă bơsong ală kal ke, kòl yan ai rơndap broă lơh lơh niam wơl gùng dờng 19. Rơndap broă lơh sơlơ tàm tơrbŏ gùng lòt tiah Tây Nguyên (lơh niam wơl gùng dờng 19) bơh Mpồl atbồ Rơndap broă lơh sồ 2, Ƀộ Giao thông Vận tải lơh cau tờm bơcri priă, geh kờp jơh priă bơcri rlau 3 rbô 600 tơmàn đông. Sơn đờm lơh bơh nam 2021 mờ jat broă rơndap lơh lơh gơs tàm nhai 6 nam 2023. Bulah bè hơ̆, bơh ală bơta ờ niam tàm broă lam lơh rơndap broă, nhai 7 nam 2023, Mpồl kwang bàng Quôk hội càr Gia Lai neh geh sră nggal tơrgùm jơnau đơs bơh cau tĕ khà dê, pơyua ală anih lơh broă dà lơgar in. Tàm hơ̆ đơs, “Rơndap broă lơh lơh niam wơl, pờ ơnàng gùng dờng 19” gơl lòt gan kơnhoàl Mang Yang mờ xã Bình Giáo, kơnhoàl Chư Prông, càr Gia Lai, tơngai lam lơh rơndap broă jŏ jòng, lơh gơ rềng tus rài kis làng bol dê, lơh gơbàn kal ke ai làng bol in tŭ lòt rê tàm gùng. Sồr Ƀộ Giao thông Vận tải sền gròi, đơng lam Mpồl atbồ rơndap broă lơh sồ 2 mờ ală mpồl lơh broă geh gơ rềng kờp sền mờ bơsong ală bơta ờ niam tàm tŭ lam lơh rơndap broă.